Majalisar Tarayya Ta Ware Gwamna 1 a Arewa, Ta Yaba Masa kan Ayyukan Alheri

• Gwamna Umaru Mohammed Bago na jihar Niger ya sha ruwan yabo a Majalisar tarayya kan ayyukan alheri da sauran bangarori
• Majalisar musamman ta ware gwamnan inda ta yaba masa wurin bunkasa harkokin noma a jihar da ke Arewa ta Tsakiya
• Hon. Babajimi Benson shi ya yi wannan yabo yayin zaman Majalisar a jiya Talata 26 ga watan Nuwambar 2024 a birnin tarayya Abuja

Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru uku.

Jihar Niger - Majalisar Tarayya ta yabawa Gwamna Umaru Bago na jihar Niger kan bunƙasa tattalin arziki.

Gwamna Bago ya samu yabon ne yayin gabatar da kudiri da Hon. Babajimi Benson daga jihar Lagos ya yi a Majalisar.

Majalisar Tarayya ta yabawa Gwamna Bago

Premium Times ta ce Benson ya bayyana haka ne yayin zaman Majalisar a jiya Talata 26 ga watan Nuwambar 2024.

Kara karanta wannan

Jonathan ya ware gwamna 1 a Najeriya, ya kira shi 'Janar' a siyasa, ya jero dalilai

Hon. Benson ya ce shugabannin kasashen Afirka da dama suna yi masa magana kan bunƙasa noma da Bago ke yi.

'Dan Majalisar ya ce yana da muhimmanci a riƙa yabawa kokarin wasu jihohi kan harkokin noma.

"Janar a soja daga Kamaru ya kira ni inda yake yabon Gwamna Bago kan bunƙasa harkar noma kuma bai san shi ba."

"Gwamna Bago ya yi kokari wurin bunkasa noma da sauran bangarori ciki har da bangaren addini."

- Hon. Babajimi Benson

Yadda Gwamna Bago ya shiryawa noma a Niger

Har ila yau, Hon Abdullahi Saidu daga Niger ya ce jihar ta zama a kan gaba wurin inganta harkokin noma da kiwo, cewar Tribune.

Hon Saidu ya ce Gwamna Bago ya ware eka 250,000 domin bunkasa noma da kuma kayan aiki na zamani a jihar.

Legit Hausa ta tattauna da wani a Niger

Wani mazaunin Minna da ke jihar Niger ya yi magana kan ayyukan Gwamna Umaru Bago.

Kara karanta wannan

'Za ku yabawa Tinubu nan gaba': Dan Majalisar Tarayya daga Arewa kan kudirin haraji

Abubakar Gimba ya tabbatar da irin inganta harkokin noma da Gwamna Mohammed Umaru Bago ke yi a Niger.

"A gaskiya gwamna yana kokari musamman wurin inganta harkokin noma da sauran bangarori."

"A kwanakin nan ya kaddamar da kayan inganta harkokin noma na zamani domin wadata jihar da abinci."

- Abubakar Gimba

Sai dai Gimba ya bukaci gwamnan ya kara kaimi wurin dakile matsalolin tsaro saboda za su ruguza kokarinsa a harkar noma.

Gwamna Bago ya inganta harkokin noma

Kun ji cewa Gwamnatin jihar Neja ta kaddamar da noma da kayan aiki na zamani a daminar bana inda ake fatan samun kayan abinci mai tarin yawa.

Gwamna Umaru Muhammad Bago ya fara shirin noman ne a kokarinsa na samar da abinci da zai wadata yan Najeriya sosai.

Umaru Muhammad Bago ya bayyana cewa amfani da kayan aikin noma na zamani zai taimaka wajen rage asara da ake yi sosai.

Muhammad Malumfashi, babban edita a sashen Hausa na Legit ya duba labarin.

Asali: Legit.ng