Dakarun Sojoji Sun Hallaka 'Yan Ta'adda da Dama Yayin Wani Artabu

• Dakarun sojojin rundunar hadin gwiwa ta ƙasa da ƙasa (MNJTF) sun samu nasarar hallaka ƴan ta'adda a jihar Borno da ke yankin Arewa maso Gabas
• Jami'an tsaron sun kashe ƴan ta'adda 15 bayan an yi musu rubdugu ta sama da ƙasa a yankin Guzamala na jihar
• Dakarun sojojin sun kuma ƙwato makamai masu tarin yawa a hannun ƴan ta'addan masu tayar da ƙayar baya

Editan Legit Hausa Sharif Lawal yana da ƙwarewar shekaru wajen kawo rahotannin siyasa, al'amuran yau da kullum, tsegumi da nishaɗi

Jihar Borno - Dakarun sojoji na rundunar hadin gwiwa ta ƙasa da ƙasa (MNJTF) da ke ƙarƙashin sashe 3 na Monguno a Najeriya sun kashe ƴan ta’adda 15.

Dakarun sojojin sun kashe ƴan ta'addan ne a wani samame da suka kai a garin Kukawa na jihar Borno.

Hakan na ƙunshe ne a cikin wata sanarwa da rundunar MNJTF ta fitar, cewar rahoton jaridar Vanguard.

Kara karanta wannan

Sojojin sama sun hallaka 'yan ta'addan Boko Haram a wani hari

Sojoji sun ragargaji ƴan ta'adda

Rundunar MNJTF ta bayyana cewa harin, ɗorawa ne kan nasarorin da aka samu kan ƴan ta'addan ISWAP a yankin waɗanda aka raunata a fafatawar da ake yi da su.

Sanarwar ta bayyana cewa sashen sojojin sama na rundunar ya farmaki ƴan ta'adda masu ɗauke da makamai da ke kan babura a Guzamala, inda suka yi munanan raunuka.

Sojojin ƙasa sun hallaka ƴan ta'adda 15 tare da kama ɗaya da rai yayin da suka yi yunƙurin tserewa bayan sun samu raunuka.

An ƙwato makamai masu tarin yawa

A yayin samamen, dakarun sojojin na MNJTF sun samu nasarar ƙwato makamai masu tarin yawa daga hannun ƴan ta'addan.

Daga cikin makaman akwai, bindigogi ƙirar AK-47 guda bakwai, babbar bindigar RPG guda ɗaya da harsasan Shilka guda 152.

Sojoji sun sheƙe kwamandan ƴan ta'adda

A wani labarin kuma, kun ji cewa hedikwatar tsaro ta ƙasa (DHQ) ta bayyana cewa dakarun sojoji sun hallaka wani kwamandan ƴan ta'adda Munzur Ya Audu.

Kara karanta wannan

Gwamnatin Kebbi da jami'an tsaro sun samu nasara kan 'yan ta'adda Lakurawa

DHQ ta kuma sanar da cewa dakarun sojojin sun hallaka ƴan ta'adda 114 tare da cafke guda 238 a cikin mako ɗaya.

Asali: Legit.ng