Rundunar Hisbah Ta Ƙara Faɗaɗuwa a Arewa, ana Neman ba su Cikakken Iko

• Rahotanni na nuni da cewa gwamnati ta kaddamar da dakarun Hisba a jihar Sokoto a ranar Alhamis, 22 ga watan Nuwamba
• Gwamnan jihar Sokoto, Ahmed Aliyu ya buƙaci yan Hisba da su yi aiki tuƙuru da kuma kiyaye dokokin kasa yayin mu'amala da al'umma
• Mai alfarma Sarkin Musulmi, Alhaji Muhammad Sa'ad Abubakar III ya bukaci a ba yan Hisba cikakken iko domin aiki yadda ya kamata
• Legit ta tattauna da wani Malamin addini, Ustaz Usman Muhammad domin jin ra'ayinsa a kan yadda Hisba ke fadaduwa

Editan Legit Hausa Ibrahim Yusuf yana da gogewar aikin jarida da rubuce-rubucen adabi sama da shekaru hudu, kuma kwararre ne a kawo rahotannin kasuwanci, siyasa da lamuran yau da kullum.

Jihar Sokoto - Gwamnatin Sokoto ta kaddamar da dakarun Hisba a jihar domin fara aiki da kuma taimakawa jami'an tsaro.

Masana na ganin lamarin ya karawa hukumar Hisba karfi a Arewacin Najeriya kuma zai taimaka wajen rage baɗala.

Kara karanta wannan

'Karshen Turji da yan bindiga ya kusa': Ministan tsaro bayan karbar jirage daga Turkiyya

Ma'aikatar addini ta jihar Sokoto ta wallafa a Facebook cewa kwamandan Hisba na jihar Kano, Sheikh Aminu Daurawa ya halarci taron.

An ƙaddamar da yan Hisbah a Sokoto

Rahotanni na nuni da cewa gwamna Ahmed Aliyu na jihar Sokoto ya jagoranci kaddamar da yan Hisbah a ranar Alhamis.

Ahmed Aliyu ya yi kira ga yan Hisbah da su kasance wakilai na gari ta inda ba za su yi amfani da aikin wajen muzgunawa al'umma ba.

Gwamnan ya ce yan Hisbah ba kamar yan sanda ba ne saboda haka idan suka kama mutum su mika shi ga jami'an tsaro.

"Muna son tsaftace jihar mu daga haɗala da kuma kawo dabi'u na gari da wasu abubuwan addini, saboda mafi yawan mutanen Sokoto Musulmai ne.

Bayan samar da ofis ofis da motoci, mun daura mutane masu nagarta da za su kula da ayyukan Hisbah."

- Gwamna Ahmed Aliyu

Kara karanta wannan

Gwamnoni 36 za su haɗa karfi domin yin kaca kaca da Lakurawa

Yan Hisbah: Maganar Sarkin Musulmi

Daily Trust ta wallafa cewa Farfesa Sambo Junaidu da ya wakilci Mai Alfarma Sarkin Musulmi ya buƙaci a ba yan Hisbah cikakken iko.

Sarkin Musulmi ya ce ta hanyar ba su cikakken iko ne kawai za su iya yin aiki kamar yadda ake tsammani.

Legit ta tattauna da Ustaz Usman

Wani malamin addini a jihar Gombe, Ustaz Muhammad Usman ya zantawa Legit cewa abin farin ciki ne yadda ayyukan Hisba ke kara karbuwa.

Ustaz Muhammad ya kara da cewa abin da Sarkin Musulmi ya fada gaskiya ne, ya ce dole a ba yan Hisba cikakken iko idan ana son su yi aiki da gaske.

Hisbah ta yi sababbin dokoki a Kano

A wani rahoton, kun ji cewa hukumar Hisbah ta haramtawa maza da mata yin hira a cikin mota mai bakin gilashi da zarar karfe 10:00 na dare ta yi a Kano.

Hukumar Hisbah ta kuma haramta duk wani nau'in cacar wasanni a jihar tare da cewa za ta cafke masu ba da hayar gidaje ana aikin badala.

Asali: Legit.ng