Bayan Arewa Ta Shafe Sama da Mako 1 a Duhu, Tinubu Ya Ba da Umarnin Gaggawa

• Shugaban kasa Bola Ahmed Tinubu ya yi magana kan matsalar wutar lantarki a Arewa bayan an shafe kwanaki babu haske
• A sakon da hadiminsa ya fitar a ranar Litinin, Bola Tinubu ya ce bai ji dadin yadda aka samu rashin wuta a jihohin Arewa ba
• Ya ba Ministan makamashi, Adebayo Adelabu da sauran jami'ai umarnin gaggauta a warware matsalar da ta jawo rashin wuta

A'isha Ahmad edita ce a sashen Hausa na Legit. Tana da ƙwarewa wajen rubutun labarai da rahotanni tsawon shekaru uku. Ta kware a kawo rahotannin, al'amuran da su ka shafi mata da yara da siyasa.

FCT, Abuja - Bayan jihohin Arewacin Najeriya sun kwana akalla takwas babu ko kyallin hasken wutar lantarki, shugaban kasa Bola Ahmed Tinubu ya bayar da umarni

Kara karanta wannan

Gwamnatin Tinubu ta fitar da sabon tsarin samar da lantarki a Arewa

Shugaba Tinubu ya ce bai ji dadin yadda layin da ke kai hasken wutar lantarki ya lalace har ta kai ga samun gagarumar matsalar rashin wuta ba.

A sakon da hadiminsa kan yada labarai, Bayo Onanuga ya wallafa a shafin X, shugaban ya fara jagorantar kawo karshen matsalar cikin gaggawa.

Tinubu ya kadu da lalata layin lantarki

A sakon da ya wallafa a shafinsa na Facebook, hadimin shugaba Tinubu kan yada labarai, Bayo Onanuga ya ce tuni shugaban kasa ya ba Ministan makamashi umarnin gaggauta gyara wutar Arewa.

Shugaban ya bayyana takaici kan rahoton da ya samu na lalata layin wutar lantarki da ta jawo rashin wuta da lalacewar kadarori a jihohin Arewacin Najeriya.

Tinubu ya ba da umarnin gyara lantarki

Shugaban kasa, Bola Tinubu ya bayar da umarnin gaggauta magance layin wutar lantarkin sa ya samu matsala,wanda jefa yan Arewa a cikin duhu.

Kara karanta wannan

Gwamnonin Arewa sun dunƙule, an miƙa dabarar magance matsalar lantarki ga Tinubu

Tinubu ya nemi injiniyoyin da ke gyaran wutar da su rubanya kokarin da su ke yi domin farfaɗo da tattalin arzikin mutanen yankin.

Arewa: TCN ya ce ana gyara lantarki

A baya mun ruwaito cewa kamfanin hasken wutar lantarki na ƙasa (TCN) ya shaidawa yan Najeriya, musamman na Arewa cewa ana can ana kokarin gyara wutar lantarki.

Layin lantarki da ke kawo hasken wuta Arewacin Najeriya ya samu matsala kimanin kwanaki takwas da su ka wuce, kuma har yanzu TCN ta ce ana kokarin gyara shi.

Muhammad Malumfashi, babban edita a sashen Hausa na Legit ya duba labarin.

Asali: Legit.ng