Jerin Kananan Ministoci da Suka Koma Manya bayan Tinubu Ya Yi Garambawul

• Shugaban kasa, Bola Tinubu ya yi sauye-sauye a mukaman Ministoci a gwamnatinsa bayan watanni ana jira
• Tinubu ya sallami wasu Ministoci biyar daga gwamnatinsa yayin da ake kiraye-kiraye kan korar wasu daga cikinsu
• Bayan sallamar Ministocin, Tinubu ya kuma amince da nadin sababbi domin maye gurbinsu da kuma hade wasu ma'aikatu

Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru uku.

FCT, Abuja - Shugaba Bola Tinubu ya sallami wasu Ministoci biyar inda ya amince da nadin wasu guda bakwai a yau Laraba 23 ga watan Oktoban 2024.

Fadar shugaban kasar ta ruwaito cewa shugaban ya karawa wasu ƙananan Ministoci zuwa manya a ma'aikatu daban-daban.

Daily Trust ta tabbatar da cewa shugaban ya yi sauye-sauye a ma'aikatu bayan hade wasu daga cikinsu wanda ya tilasta sallamar Ministocin guda biyar.

Kara karanta wannan

A ƙarshe, Bola Tinubu ya maye gurbin Betta Edu, ya naɗa sabon ministan jin ƙai

Ministocin da aka karawa matsayi

Legit Hausa ta duba Ministocin da suka samu karin girma daga matsayinsu zuwa manyan Ministoci.

1. Morufu Alausa - Ministan Ilimi

Bola Tinubu ya daga matakin Alausa daga karamin Ministan lafiya zuwa babban Minista a ma'aikatar Ilimi.

Nadin Alausa ya biyo bayan sallamar Farfesa Tahir Mamman daga mukaminsa a yau Laraba 23 ga watan Oktoban 2024.

2. Imaan Sulaiman-ibrahim - Ministar mata

Imaan Sulaiman-ibrahim ta maye gurbin tsohuwar Ministar harkokin mata, Uju Kennedy-Ohanenye a yau Laraba.

Kafin nadin nata, Imaan wacce ta fito daga jihar Nasarawa ita ce karamar Ministar harkokin yan sanda a Najeriya.

3. Ayodele Olawande - Ministan cigaban matasa

Ayodele Olawande ya samu karin girma zuwa muƙamin babban Ministan cigaban matasa a yau Laraba 23 ga watan Oktoban 2024.

Kara karanta wannan

'Ba mu yarda ba': Wani dattijo ya nuna Tinubu da yatsa kan rusa ma'aikatar Neja Delta

Kafin wannan nadin, Olawande ya kasance karamin Minista a ma'aikatar cigaban matasa inda ya zama babban Minista.

Tinubu ya yi garambawul a gwamnatinsa

A baya, kun ji cewa shugaba Bola Tinubu ya rushe wasu ma'aikatu a Najeriya tare da yin sauye-sauye a mukaman Ministoci.

Bola Tinubu ya rushe ma'aikatar harkokin wasanni da kuma Neja Delta inda ya hade wasu ma'aikatu daban-daban a kasar.

Wannan na zuwa ne bayan korafe-korafe da yan Najeriya suka rika yi domin shugaban ya sallami wasu daga cikin Ministocinsa.

Muhammad Malumfashi, babban edita a sashen Hausa na Legit ya duba labarin.

Asali: Legit.ng