Gwamna a Arewa Ya Shiga Layi, Ya Sanar da Sabon Albashin da Zai Iya Biyan Ma'aikata

• Ma'aikatan gwamnati a jihar Kwara za su fara cin moriyar sabon mafi ƙarancin albashi na N70,000 daga watan Oktoba, 2024
• Gwamna Abdulrahman Abdulrazaq ya umarci a fara biyan sabon al.bashin nan take bayan ganawa da ƴan kwadago da kamfanoni
• Kwamishinar kuɗi ta jihar Kwara, Dr. Hauwa Nuru ta ce wannan mataki ya kara nuna yadda gwamna ya himmatu wajen inganta walwalar ma'aikata

Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum

Kwara - Gwamnan jihar Kwara, Abdulrahman Abdulrazaq ya bi sahun wasu gwamnoni a shirin fara biyan sabon mafi ƙarancin albashi na N70,000.

Gwamna Abdulrazaq ya ba da umarnin a fara biyan ma'aikatan jihar Kwara sabon albashin daga wannan watan da muke ciki watau Oktoba, 2024.

Kara karanta wannan

Kano: Muhimman abubuwa 5 game da kwamishinan da aka kama da zargin lalata da matar aure

Kwamishinar kuɗi, Dr Hauwa Nuru ce ta bayyana haka a wata sanarwa da gwamnatin Kwara ta wallafa a shafin X ranar Asabaar.

Gwamnan Kwara ya amince da N70,000

Dr Hauwa ta ce gwamnan ya amince da N70,000 a matsayin sabon albashi mafi ƙaranci kamar yadda gwamnatin tarayya ta cimma matsaya da ƴan kwadago.

Hauwa Nuru ta ce:

"A wani yunkuri na inganta jin dadin ma’aikata a Kwara, Mai girma gwamna Malam AbdulRahman AbdulRazaq, ya amince da sabon mafi karancin albashi na N70,000 kamar yadda gwamnatin tarayya ta sanar.”

Yaushe za a fara biyan sabon albashi a Kwara?

Kwamishinar ta bayyana cewa za a aiwatar da wannan doka ta mafi ƙarancin albashi a watan Oktoba, ma'ana za a fara biyan ma'aikata a wannan wata.

A cewarta, an cimma wannan matsaya ne a wani taro da aka yi tsakanin gwamnatin Kwara, ƴan kwadago NLC, TUC da kamfanoni masu zaman kansu.

Kara karanta wannan

Gwamna Ya kere tsara, ya amince da sabon mafi ƙarancin albashi sama da N80,000

Hauwa Nuru ta yabawa Gwamna AbdulRazaq bisa baiwa kwamitin da aka kafa cikakken ‘yanci har aka cimma matsayar da za ta amfanar da dukkan bangarorin da abin ya shafa.

Ta ƙara da cewa mai girma gwamna ya himmatu wajen kyautata rayuwar ma'aikata da ɗaukacin al'ummar jihar Kwara.

Gwamna Fubara ya kara albashi zuwa N85,000

A wani rahoton kuma Gwamna Siminalayi Fubara ya kere N70,000, ya amince da N85,000 a matsayin sabon mafi ƙarancin albashi a jihar Ribas.

Shugaban ma'aikatan jihar, George Nwaeke ya ce gwamnan ya amince da sabon albashin ne yayin ganawa da ƴan kwadago.

Asali: Legit.ng