Magana Ta Kare, Sanatoci Sun Raba Gardama kan Shirin Tsige Shugaban Majalisar Dattawa

• Ƴan majalisar dattawa sun jaddada goyon bayansu da suka kaɗa kuri'ar amincewa da shugabancin Godswill Akpabio
• Sanatocin sun ɗauki wannan matakin biyo bayan yaɗuwar rahoton da ke cewa suna shirin tsige shugaban majalisar dattawa
• Tun farko dai wasu rahotanni sun yi ikirarin ana ƙulla yadda za su sauke Akpabio, lamarin da gwamnatin kasar ta fito ta ƙaryata

Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum

FCT Abuja - Sanatoci sun kawo karshen duk wata jita-jita a ake yaɗawa, sun kaɗa kuri'ar amincewa da shugaban majalisar dattawa, Godswill Akpabio.

Wannan mataki na zuwa ne a daidai lokacin da ake yaɗa wasu rahotanni cewa ƴan majalisar dattawa na shirye-shiryen tsige Akpabio daga muƙaminsa.

Kara karanta wannan

Magidanci a Kano ya shiga matsala bayan ya raunata matarsa a wuri mai daraja

Yadda aka yaɗa jita-jitar tsige Akpabio

Rahoton The Nation ya tattaro cewa a jiya Laraba, wasu kafafen watsa labarai sun yaɗa labarin fadar shugaban ƙasa ta tura dakarun DSS zuwa majalisar dattawa.

A cewar rahotannin, an tura jami'an ne domin hana sanatoci aiwatar da wasu ayyuka ciki har da yunƙurin tsige shugaban majalisar Sanata Akpabio.

Sanata Akpabio dai ya musanta jita-jitar tun farko, inda ya bayyana cewa kan sanatoci a haɗe yake, babu wani abu mai kama da shirin tsige shi.

Ita ma fadar shugaban kasa, a wata sanarwa da ta fitar ta ce babu wata barazanar tsige Akpabio a majalisar dattawa.

Sanatoci sun jaddada mubaya'a ga Akpabio

A zamansu na yau Alhamis, 17 ga watan Oktoba, ƴan majalisar dattawan sun kawo karshen duk wasu raɗe-raɗe, sun jaddada mubaya'a ga Akpabio.

Sanatocin sun kaɗa kuri'ar nuna ƙwarin guiwa ga shugabancin Sanata Akpabio, ma'ana dai babu wata magana ta shirin tsige shi.

Kara karanta wannan

Da gaske alaka ta yi tsami tsakanin Majalisar Tarayya da Tinubu? an samu bayanai

Majalisa ta yi magana kan farashin fetur

A wani rahoton kuma majalisar dattawa ta ce kamata ya yi kasuwar fetur ta rika yi wa kanta farashi tun bayan janye tallafi a bangaren.

Kamfanin mai na kasa (NNPCL) dai ya kara wa masu sayen fetur a gari da yan kasuwa farashi zuwa sama da N1,000 a kowace lita.

Muhammad Malumfashi, babban edita a sashen Hausa na Legit ya duba labarin.

Asali: Legit.ng