Farashin Man Fetur Na Iya Sauka yayin da Majalisa Ta Sa Baki kan Ƙarin da Aka Yi

• Mai yiwuwa a samu saukin tsadar man fetur da majalisar wakilan tarayya ta sa baki kan ƙarin farashin lita a Najeriya
• A zamanta, majalisar ta buƙaci a gaggauta soke ƙarin farashin da aka yi kwanan nan saboda ya kara jefa mutane cikin wahala
• Tun bayan cire tallafin mai ranar 29 ga watan Mayu, 2023, ƴan Najeriya suka fara fuskantar tsadar fetur da ba a taba gani ba

Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum

Abuja - Yayin da rayuwa ke ƙara tsada a ƙasar nan, majalisar wakilan tarayya ta tsoma baki kan ƙarin farashin man fetur a Najeriya.

Majalisar ta yi kira ga gwamnatin tarayya ta gaggauta soke ƙarin farashin man fetur da gas na girki domin saukaƙawa mutane halin da suke ciki.

Kara karanta wannan

Mutane kusan 100 sun rasu sakamakon fashewar tankar mai a Jigawa

Channels tv ta ce majalisar wakilai ta ɗauki wannan mataki ne a wani kudiri da mataimakin shugaban marasa rinjaye, Aliyu Madaki da ƴan majalisa 111 suka gabatar.

Majalisa ta nuna damuwa da farashin fetur

Ƴan majalisar sun koka cewa karin farashin fetur da gas na ƙara tunkuɗa ƴan Najeriya cikin wahala kuma barazana ce ga sana'o'i da dama.

Hakan ya sa majalisar wakilai ta umarci kamfanin mai na ƙasa watau NNPCL da ma'aikatar man fetur su lalubo hanyoyin da za a kara yawan man da ake tacewa a gida domin ya yi arha.

Bugu da ƙari majalisar ta bukaci babban bankin Najeriya watau CBN ya ɓullo da tsare-tsaren da suka dace domin rage tasirin hauhawar farashin kayayyaki bayan tashin mai.

Yadda fetur ya tashi bayan hawan Tinubu

Tun bayan tuge tallafun man fetur da shugaban ƙasa, Bola Ahmed Tinubu ya yi a ranar da aka rantsar da shi, farashin litar mai ta ci gaba da tashi a Najeriya.

Kara karanta wannan

'Yan Majalisar PDP sun rasa kujerunsu, an ba INEC damar shirya sabon zaɓe

Fetur ya kara tsada daga kusan N200, sai da kowace lita ɗaya ta haura N1,000, hakan ya sa farashin kayayyaki ya kara hauhawa, cewar Leadership.

Sai dai majalisar wakilai ta nuna damuwa kan halin da mutane za su shiga musamman bayan ƙarin da aka yi kwanan nan, ta umarci a soke sabon ƙarin.

NNPCL da ƴan kasuwa sun daidaita

A wani rahoton kuma kamfanin NNPCL da kungiyar yan kasuwar man fetur sun cimma matsaya kan farashin litar mai.

Rahotanni sun nuna cewa an samu daidaiton ne bayan shiga tsakani da hukumar tsaron farin kaya watau DSS ta yi kan lamarin.

Muhammad Malumfashi, babban edita a sashen Hausa na Legit ya duba labarin.

Asali: Legit.ng