Wata Ƙungiyar Addinin Musulunci Ta Dura kan Shugaba Tinubu, Ta Faɗa Masa Gaskiya

• Wata ƙungiyar Musulunci a Najeriya ta yi kira ga shugaban ƙasa Bola Tinubu ya nemo hanyoyin yaye wahalar da ƴan Najeriya ke ciki
• Kungiyar mai suna Hijrah ta ce babu abin da mutane ke buƙata da ya wuce samun sassauci daga matsin tattalin arzikin da suka shiga
• Hijrah ta kuma buƙaci gwamnati a kowane mataki ta maida hankali wajen bullo da tsare-tsaren da za su kawo sassauci a ƙasar nan

Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum

Abuja - Wata ƙungiyar addinin Musulunci a Najeriya 'Hijrah' ta buƙaci shugaban ƙasa, Bola Ahmed Tinubu ya ɓullo da hanyoyin warware wahalhalun da ake ciki.

Ƙungiyar ta roƙi shugaban ƙasa ya fito da ingantattun tsare-tsaren tattalin arziki waɗanda za su share hawayen ƴan Najeriya game da kuncin da ake ciki.

Kara karanta wannan

Garambawul: An bukaci Tinubu ya nada El Rufai da wasu mutum 4 ministoci

Hakan na kunshe a wata sanarwa mai dauke da sa hannun shugaban ƙungiyar na kasa, Farfesa Badmas Yusuf da sakatarensa, Abubakar Ayinla, rahoton Daily Trust.

Hijrah ta faɗawa gwamnatin Tinubu mafita

A sanarwar da ƙungiyar ta fitar ranar Laraba, ta roki kowane mataki na gwamnati ya ba da fifiko wajen inganta walwalar talakawa da share masu hawaye.

Hijrah ta kuma roƙi Tinubu ya lalubo hanyoyin magance matsin tattalin arzikin da ‘yan Najeriya ke fuskanta yayin da ake murnar cika shekaru 64 da samun ‘yancin kai.

Kungiyar ta shawarci Tinubu da cewa ya kamata, "kyautar da zai yi wa ƴan Najeriya na cika shekaru 64 da samun 'yancin kai ta zama sassauci daga halin matsin da ake ciki."

Kungiyar Musulunci ta yi wa ciyamomi nasiha

A bangaren gida kuwa, Hijrah ta yi kira ga sabbin shugabannin kananan hukumomi da kansiloli da aka rantsar a Kwara da su mulki jama'a da tsoron Allah.

Kara karanta wannan

Murnar 'yancin kai: Muhimman abubuwan da za a tuna da su daga jawabin Tinubu

Ta kuma tunatar da ciyamomi cewa gwamnatin ƙanann hukumomi na da matuƙar muhimmanci wajen samar da sauƙi da ci gaban al'umma, rahoton Leadership.

Sanata Ndume ya ba Tinubu shawara

A wani rahoton kuma Sanata Ali Ndume ya shawarci gwamnatin tarayya ta dauko hayar sojojin da za su kakkabe yan ta'adda a Najeriya.

Sanata Ndume da ke wakiltar Borno ta Kudu a majalisar dattawan kasar nan ya ce sojojin haya na da manyan makaman yakar miyagu.

Muhammad Malumfashi, babban edita a sashen Hausa na Legit ya duba labarin.

Asali: Legit.ng