UNIMAID: Bayan Masifar Ambaliya, Jami'ar Maiduguri ta Nada Sabon Shugabanta

• Hukumomi a Jami'ar Maiduguri sun nada Farfesa Mohammed Laminu Mele a matsayin sabon shugabanta
• Farfesa Laminu Mele kafin wannan mukami shi ne ya rike mukaddashin shugaban Jami'ar na tsawon lokaci
• Mele daga karamar hukumar Mafa a jihar Borno ya shafe fiye da shekaru 20 yana koyarwa da kuma bincike

Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru uku.

Jihar Borno - Hukumar gudanarwa ta Jami'ar Maiduguri da ke jihar Borno ta nada sabon shugabanta.

An nada Farfesa Mohammed Laminu Mele a matsayin shugaban Jami'ar da ke Arewa maso Gabas.

An nada Farfesa Mele shugaban Jami'ar Maiduguri

Wannan na kunshe ne a cikin wata sanarwa da magatakardan Jami'ar, Ahmad Lawan ya fitar a jiya Laraba 18 ga watan Satumbar 2024, cewar rahoton Tribune.

Kara karanta wannan

Ahmad Isa: Mai gabatar da shirin Rai Dangin Goro a gidajen rediyo ya kwanta dama

Sanarwar ta ce nadin zai fara aiki nan take inda ta ce an bi dukkan ka'idoji kafin nada Farfesan, kamar yadda Leadership ta ruwaito.

Ahmad Lawan ya ce Farfesa Mele ya cancanci wannan mukami saboda kwarewarsa.

Farfesa Mele dan asalin karamar hukumar Mafa ne a jihar Borno wanda ke da mata da kuma yara da dama.

Mele ya shefe shekaru 20 yana koyarwa da bincike da hidima ga al'umma domin cigabansu.

Maiduguri: Mukaman da Farfesa Mele ya rike

Kafin rike wannan mukami, Mele ya rike mukaddashin shugaban Jami'ar da kuma mataimakin shugabanta a bangaren gudanarwa.

Har ila yau, Farfesa Mele ya kasance kwararre a fannin yaren Turanci wanda ya shafe shekaru da dama a tsangayar koyar da harsuna.

Sanarwar ta taya Farfesa Mele murnar samun wannan matsayi mai daraja inda ta yi masa addu'ar fatan alheri da aiwatar da aikinsa cikin nasara.

Kara karanta wannan

Borno: Manya na ci gaba da zuwa jaje Maiduguri, an ƙara bada tallafin N50m

Tattaunawar Legit Hausa da dalibin Jami'ar Maiduguri

Legit Hausa ta ji ta bakin wani dalibi game nada sabon shugaban Jami'ar Maiduguri.

Mukhtar Muhammad da ke tsangayar koyarwar addinin Musulunci ya yaba da nadin Farfesa Laminu Mele.

Mukhtar ya ce Farfesa Mele mutum ne haziki wanda ya san hakkin dalibai da kuma ma'aikatan Jami'ar.

Ya ce muƙamin da ya rike na mukaddashin shugaban Jami'ar ya tabbatar da cewa zai kawo sauyi a makarantar.

Ambaliyar ruwa: An rufe Jami'ar Maiduguri

Kun ji cewa ambaliyar ruwan da aka samu a birnin Maiduguri, babban birnin jihar Borno ta jawo an rufe jami'ar UNIMAID .

Mahukuntan jami'ar sun sanar da hakan domin kare ɗalibai da ma'aikata sakamakon ambaliyar da ta auku.

Muhammad Malumfashi, babban edita a sashen Hausa na Legit ya duba labarin.

Asali: Legit.ng