Edo 2024: PDP Ta Fusata Bayan Mataimakin Gwamna Ya Fice Daga Jam’iyyar Zuwa APC

• Jam'iyyar PDP a jihar Edo ta yi tofin Allah-wadai kan Philip Shaibu, mataimakin gwamnan jihar Edo da ya koma jam'iyyar APC
• Kamar yadda takardar da Debo Ologunagba ya fitar ta bayyana, ra'ayinsa na son kai da zagon ƙasa ga zabin jama'ar Edo ya fito fili
• Ta bayyana cewa PDP na da kwarin guiwa ɗan takararta zai yi nasara a zaben gwamnan jihar mai zuwa duk da tafiyar Shaibu

Sani Hamza, kwararren edita ne a fannin nishadi, al'amuran yau da kullum da kuma siyasa. Sani yana da shekaru sama da biyar a aikin jarida

Edo - Jam'iyyar PDP ta bayyana tsananin fushinta kan komawar mataimakin gwamnan jihar Edo da kotu ta jaddada, Kwamared Philip Shaibu, zuwa jam'iyyar APC.

A wata takarda da ya fitar ranar Lahadi, sakataren yaɗa labarai na PDP, Debo Ologunagba, ya bayyana cewa jam'iyyar ta shirya murƙushe ƙarfin ikon Shaibu na siyasa.

Kara karanta wannan

Kaduna: Tsohon kwamishina da jiga-jigan PDP sun watsar da ita, sun kama layin Ganduje

Jaridar The Nation ta ruwaito cewa, wannan hukuncin na zuwa ne matsayin martani kan sauya sheka da Shuaibu ya yi.

PDP ta caccaki Shaibu kan komawa APC

An ce jam'iyyar PDP ta na kallon hakan a matsayin babbar barazana yayin da Shaibu ya tsallake ɗan takararsu na gwamna, Asue Ighodalo.

"PDP na sukar Kwamared Philip Shaibu kan komawarsa zuwa APC mara tausayi, wacce ba ta jama'a take ba, duk da cewa ya koma ne bayan shirinsa na zagon ƙasa ya fadi.

“Da komawarsa APC, Kwamared Shaibu ya nuna asalin manufarsa ta kasancewa cikin jam'iyyar maciya rashawa, marasa tausayi da suka saba da danne hakkin jama'a.

"Ta hanyar bayyana abin da yake ɓoye a zuciyarsa, Kwamared Shaibu ya tabbatar da cewa bai shiga takarar gwamna domin jama'ar Edo ba sai domin manufarsa ta siyasa."

- A cewar sanarwar.

Kara karanta wannan

Dan majalisar APC ya gwangwaje ɗiyarsa da kyautar dalleliyar SUV bayan gama sakandare

"PDP za ta yi nasara a Edo" - Ologunagba

PDP ta kuma yi ikirarin cewa masu ruwa da tsaki na APC sun yi watsi da Kwamared Philip Shaibu a ƙaramar hukumar Etsako ta Yamma, jaridar Punch ta ruwaito.

Sanarwar Ologunagba ta kara da bayyana kwarin guiwar cewa ɗan takarar PDP zai yi nasara a zaben gwamnan Edo mai zuwa.

Edo: Mataimakin gwamna ya koma APC

A wani labari na daban, mun ruwaito muku cewa mataimakin gwamnan jihar Edo, Kwamared Philip Shaibu, yayi watsi da jam'iyyar PDP inda ya koma APC.

Philip Shaibu ya ce yanzu haka abu ɗaya ya rage masa a jam'iyyar PDP, shi ne sanarwa a hukumance na barinta tare da mayar da hankali kan siyasarsa.

Muhammad Malumfashi, babban edita a sashen Hausa na Legit ya duba labarin.

Asali: Legit.ng