An Tashi da Jimami a Arewa, ’Yan Bindiga Sun Yi Asubanci, Sun Sace Mata Mai Ciki, Wasu 4
- An shiga tashin hankali a Niger yayin da ‘yan bindiga suka farmaki wani gida tare da sace mutane sama da 4 cikin dare
- Rahoto ya bayyana yadda ‘yan ta’addan suka yi saraf tare da shiga gida, inda suka sace mace mai juna biyu tare da danta
- Watanni sama da hudu kenan ‘yan yankin ke zaune ba tare da fuskantar harin ‘yan ta’adda ba, sun tashi da jimami a makon nan
Salisu Ibrahim ne babban editan sashen Hausa na Legit. Kwararren marubucin fasaha, harkar kudi da al'amuran yau da kullum ne, yana da gogewar aikin jarida da rubuce-rubucen adabi sama da shekaru takwas
Jihar Niger - Sararawar watanni hudu da al’ummar Garam a jihar Niger suka samu ya samu tasgaro a safiyar Asabar lokacin da ‘yan bindiga suka kai hari a unguwar, suka yi garkuwa da wata mata mai juna biyu da kuma wasu mutane hudu.
Garam, unguwar da ke kan iyaka da Karamar Hukumar Bwari ta Babban Birnin Tarayya (FCT), ta shiga cikin rudani tsakanin watan Disamban 2023 da Fabrairun 2024 lokacin da ‘yan ta’adda suka kai hare-hare fiye da sau hudu, inda aka yi garkuwa da mutane da dama.
Asali: Original
Duk da cewa al'ummar sun dan ji dadin hutun da suka samu, ‘yan bindiga sun sake kai farmaki tare da tafka mummunan barna, Daily Trust ta ruwaito.
LURA: Shin kana son bamu labari da tattaunawa da marubutanmu? Tuntubemu a info@corp.legit.ng
Mazauna sun fadi bala’in da suka ji
Wani mazaunin unguwar ya shaida wa manema labarai cewa ‘yan bindigar sun shigo unguwar ne ta daji da misalin karfe 3 na asuba a ranar Asabar, kuma suka shiga gidan wadanda suka yi garkuwa da su.
Wata majiya ta bayyana cewa ‘yan bindigar ba su harba bindiga sama ba don kaucewa ankarewar jami’an tsaro a yankin.
A cewar majiyar:
“Mun ji cewa sun zo da misalin karfe 3:00 na asuba. Sun yi garkuwa da mutane biyar ciki har da wata mata mai juna biyu tare da yaronta da mijinta.”
Yadda ‘yan bindigan suka kutsa gidan mutane
Majiyar ta kuma bayyana yadda ‘yan ta’addan suka shiga gida, inda tace:
“Sun kutsa cikin gidan ne ta hanyar tura kofa da karfi. Sun zo cikin sirri ba tare da harba bindiga ba kamar yadda suke yi a baya.
“Matar mai juna biyu da mijinta ‘yan kabilar Nupe ne tare da dansu, sun kuma yi garkuwa da wani Bahaushe da kwanan nan ya shigo gidan da kuma wani yaro.”
An sace alkaliya da ‘ya’yanta a Kaduna
A bangare guda, wasu ‘yan bindiga sun yi garkuwa da wata alkaliyar kotu, Janet Galadima-Gimba, tare da ‘ya’yanta maza hudu a Kaduna.
Rahotanni sun ce ‘yan bindigan sun sace alkaliyar da ‘ya’yanta a gidansu da ke unguwar Mahuta a Kaduna a ranar 23 ga watan Yuni.
‘Yan bindigan da suka yi garkuwa da su, wadanda adadinsu ya kai 15, sun kai farmaki gidan ne da daddare a lokacin da mijinta wanda likita ne, yake wajen aiki, cewar rahoton jaridar TheCable.
Asali: Legit.ng
