Hukumar NDLEA Ta Kama Masu Ta'ammali da Miyagun Kwayoyi Sama Da 300 A Kano
- Hukumar hana sha da fataucin miyagun kwayoyi ta samu gagarumin nasara wajen yaki da ta'ammalli da miyagun kwayoyi
- A cikin watanni 3, ta kama mutane 319 da ake zargi suna da hannu dumu-dumu cikin harkar kwaya a Kano, 14 mata sauran 305 kuma maza ne
- Hukumar ta kuma cafke tan 4.7 na mugayen kwayoyi, cikin su akwai tramadol, wiwi da sauran kayan gusar da hankali
Kano - Hukumar hana sha da fataucin miyagun ƙwayoyi ta NDLEA ya bayyana samun gagarumar nasarar kama mutane 319 da ake zargi da ta'ammalli da miyagun ƙwayoyi a sassan jihar Kano.
Leadership ta ruwaito cewa kwamandan hukumar reshen jihar Kano, Abubakar Idris Ahmad ya ce cikin waɗanda aka kama, 14 mata ne sauran 305 kuma maza.
Asali: UGC
Kwamandan ya kara da cewa sun kuma samu nasarar cafke tan 4.7 na muggan ƙwayoyi a tsakanin watan Janairu zuwa Maris ɗin 2024.
"Jimillar ƙwayoyin da muka kama sun haura tan huɗu, ciki har da wiwi da sauran miyagun ƙwayoyi masu gusar da hankali."
LURA: Shin kana son bamu labari da tattaunawa da marubutanmu? Tuntubemu a info@corp.legit.ng
- Abubakar Idris Ahmad
A cikin aikin da hukumar NDLEAn ta yi, kwamandan ya ce jami'ansu sun ƙwato tramadol kimanin 1.9kg a sumamen da suka kai sassan Kano.
NDLEA na ayyukan ceto 'yan kwaya
Jami'in ya ce ayyukan da su ke yi yanzu ya wuce kawai a kama masu ta'ammalli da miyagun ƙwayoyin.
"Mun samu nasara a kotu inda aka ɗaure mutane 33 da ake zargi da ta'ammalli da miyagun ƙwayoyi a Kano."
"Mun kuma samu nasarar kai ƴan ƙwaya 26 gidan gyara tarbiyya, da yiwa mutane 30 a masarautar Kano gwajin amfani da miyagun ƙwayoyi."
- Abubakar Idris Ahmad
Yayin da ake sa ran fara bukukuwan sallah a wannan makon, Abubakar Ahmad Idris ya ce za su ruɓanya ƙoƙari wajen daƙile amfani da miyagun ƙwayoyi tsakanin matasan jihar Kano.
Mutane 198 NDLEA ta Kama a Janairu
A farkon shekarar nan ma sai da hukumar ta NDLEA ta sanar da kama wasu mutane 198 da ake zargi da hada-hadar miyagun kwayoyin.
An kama mutanen ne a wuraren hada-hadar kwayoyi kimanin 21 a sassan jihar Kano, kamar yadda Punch ta ruwaito.
A cikin adadin, 177 maza ne, sauran 21 kuma mata.
Asali: Legit.ng
