Yan Bindiga da Dama Sun Halaka Yayin Harin Ramuwar Gayya a Sokoto

• Ƴan bindiga masu yawan gaske sun gamu da ajalinsu bayan sun kawo harin ramuwar gayya a ƙauyen Tukandu na jihar Sokoto
• Miyagun ƴan bindigan dai sun zo ƙauyen domin ɗaukar fansar halaka wani ɗan bindiga da aka yi har lahira a ƙauyen
• Jami'an tsaro sun yi musayar wuta da ƴan bindigan inda suka sheƙe masu yawan gaske tare da ƙwato babura da manyan makamai a hannunsu

Jihar Sokoto - Rayukan ƴan bindiga da dama sun salwanta yayin da suka kai harin ramuwar gayya a ƙauyen Tukandu da ke ƙarkashin gundumar Sakkwai a ƙaramar hukumar Tangaza ta jihar Sokoto.

Daily Trust ta ce ƴan bindigan sun gamu da ajalinsu ne lokacin da suka shiga ƙauyen da misalin ƙarfe 2:00 na rana a ranar Talata, 24 ga watan Oktoba, domin ɗaukar fansa kan kisan da aka yi wa wani ɗan bindiga a ranar Litinin.

Kara karanta wannan

Yan Bindiga Sun Yi Awon Gaba da Malamar Jami'a a Wani Sabon Hari a Arewacin Najeriya

An bayyana cewa ƴan bindigan sun yi yunkurin kai hari ƙauyen ne a ranar Litinin amma sun fuskanci turjiya daga mutanen ƙauyen, lamarin da ya yi sanadiyyar kashe mutum biyu ciki har da wani ɗan bindiga.

Ta wacce hanya aka shammaci ƴan bindigan?

Tsammanin cewa ƴan bindigan za su kawo harin ramuwar gayya ya sanya mazauna ƙauyen suka tsere inda suka bar jami'an soji da aka tura domin dawo da zaman lafiya a ƙauyen.

Ƴan bindigan da ba su san da wannan shirin ba, sun kai farmaki ƙauyen ne da misalin ƙarfe 10:00 na safe, amma sai sojoji suka yi artabu da su wanda ya ɗauki tsawon lokaci.

Wani mazaunin yankin da ya tabbatar da aukuwar lamarin, ya ce an kashe ƴan bindiga da dama a yayin da wani jami'in soji ɗaya ya samu raunuka.

Kara karanta wannan

Yan Bindiga Sun Yi Awon Gaba da Mata Mai Shayarwa da Wasu Mutane Masu Yawa a Jihar Arewa

Ya ƙara da cewa an ƙwato babura guda 12 da bindigogi ƙirar AK 47 guda uku daga hannun ƴan bindigan.

Mai baiwa Gwamna Ahmed Aliyu shawara kan harkokin tsaro, Kanal Ahmed Usman (mai ritaya) ya tabbatar da aukuwar lamarin.

Yan Bindiga Sun Yi Awon Gaba da Matafiya

A wani labarin kuma, ƴan bindiga sun tare wasu matafiya yayin da suke dawowa daga kasuwa a ƙauyen Iche na ƙaramar hukumar Kagarko ta jihar Kaduna.

Ƴan bindigan a yayin harin sun yi awon gaba da mutum biyar ciki har da wata mata mai shayarwa.

Asali: Legit.ng