Rayukan Mutum 8 Sun Salwanta a Wasu Haduran Mota a Jihohin Ogun Da Ondo
- Wasu munanan haɗuran mota da suka auku a titunan Legas-Ibadan da Akure-Owo a.jihohin Ogun da Ondo sun salwantar da rayukan mutum takwas
- A hatsarin na kan titin Legas-Ibadan rayukan mutum biyu sun salwanta yayin da wasu mutum takwas suka samu raunika
- Wani jami'in ɗan sanda da wasu mutum biyar sun riga mu gidan gaskiya a hatsarin da ya auku na kan titin Akure-Owo
DUBA NAN: Bibiyi shafin Legit.ng Hausa a kafar TikTok. Kada ka bari bidiyo mai daukar hankali ya wuce ka!
Jihar Ogun - Mutum takwas sun riga mu gidan gaskiya yayin da wasu da dama suka samu raunika a wasu haɗura da suka auku a kan titunan Legas-Ibadan da Akure-Owo a ranar Talata.
Jaridar Daily Trust ta ce mutum biyu sun rasu a ranar Talata yayin da wasu mutum takwas suka samu raunika a hatsarin da ya auku a tsakanin wata mota ƙirar Toyota Hiace da wata babbar mota a kusa da jami'ar Christopher kan titin Legas-Ibadan.
Asali: UGC
Kakakin hukumar kiyaye haɗura (FRSC) reshen jihar Ogun, Florence Ekpe, ta bayyana cewa hatsarin ya auku da misalin ƙarfe 11:30 na safe.
Ta bayyana cewa jami'an hukumar da ke a kwanar Mowe da jami'an hukumar tabbatar da bin dokokin tuƙi (TRACE) ne suka yi haɗaka wajen ceto waɗanda hatsarin ya ritsa da su.
DUBA: Shigo shafin Legit.ng na manhajar Legit.ng na Telegram! Kada ka bari komai ya wuce ka
Ta yi bayanin cewa hatsarin ya ritsa da mutum 10 waɗanda suka haɗa da maza bakwai da mata uku, inda namiji ɗaya da mace ɗaya suka rasu.
Mutum shida sun rasu a titin Akure-Owo
Haka kuma, wani jami'in ɗan sanda da wasu mutum biyar a ranar Talata sun rasa rayukansu, a wani hatsarin mota da ya auku a Ogbese kan titin Akure-Owo a jihar Ondo, rahoton The Nation ya tabbatar.
Daily Trust ta tattaro cewa hatsarin wanda ya ritsa da wata babbar mota da ƙaramar mota ƙirar Toyota Sienna mai lamba FFN 310 PU, ya auku ne a dalilin gudu wanda ya wuce ƙa'ida.
Mutum 6 Sun Rasu a Hatsarin Mota
A wani labarin kuma, rayukan mutum shida sun salwanta a wani mummuman hatsarin mota da ya auku a jihar Osun.
Hatsarin motar ya auku ne akan titin Imesi-Ile, lokacin wasu motoci guda biyu, babba da ƙarama suka yi taho mu gama.
Asali: Legit.ng
