Bosun Jeje Tsohon Kwamishinan Gidaje Na Jihar Legas Ya Riga Mu Gidan Gaskiya

• Bosun Jeje, tsohon kwamishinan gidaje na jihar Legas ya riga mu gidan gaskiya, kamar yadda babban yayansa, Fasto Adekunle Jeje ya tabbatar
• Jeje ya riƙe muƙamin kwamishinan gidaje a ƙarƙashin gwamnatin tsohon gwamna Babatunde Raji Fashola
• Sanata Gbenga Ashafa, tsohon sanatan Legas ta Gabas ya nuna kaɗuwarsa tare aike wa da saƙon ta'aziyyarsa kan rasuwar Jeje

Jihar Legas - Bosun Jeje, tsohon kwamishinan gidaje na jihar Legas, ya yi bankwana da duniya.

Babban yayan kwamishinan, fasto Adekunle Jeje, shi ne ya sanar da rasuwarsa a shafinsa na Facebook a ranar Asabar, 2 ga watan Satumban 2023.

"Allah ya yi maka rahama ƙanina Moshood Olatunbosun Adedeji Jeje wanda aka fi sani da BOJECO, Mr PARKERS ya rasu a ranar Asabar, 2 ga watan Satumban 2023. An yi jana'izarsa kamar yadda addinin musulunci ya tanada." A cewar sanarwar.

Kara karanta wannan

Shugaban APC Na Ƙasa Ya Ɓullo da Sabon Tsari, Zai Gina Abu 1 a Kowace Gunduma a Najeriya

Legit.ng ta tattaro cewa Bosun Jeje ya riƙe muƙamin kwamishinan gidaje a lokacin gwamnatin tsohon gwamnan jihar Legas Babatunde Raji Fashola.

Sanata Gbenga Ashafa ya yi ta'aziyyar Bosun Jeje

A halin da ake ciki, Sanata Gbenga Ashafa, tsohon sanatan Legas ta Gabas ya yi ta'aziyyar rasuwar Jeje, wacce ya bayyana a matsayin mai matuƙar kaɗuwa.

Sanatan a cikin wata sanarwa a shafinsa na Facebook ya rubuta cewa:

"Cikin kaɗuwa da baƙin ciki na rubuta domin aike wa da saƙon ta'aziyya ga dukkanin iyalan Jeje da shugabanni/mambobi na jam'iyyar All Progressives Congress (APC) a jihar Legas, musamman na mazaɓar sanatan Legas ta Gabas, bisa rasuwar Hon. Bosun Jeje da safiyar ranar Asabar, 2 ga watan Satumban 2023."

Ya bayyana marigayin a matsayin ɗan uwa, aboki, mutumin kirki, lauya, ma'aikacin banki, mai taimako, ɗan kasuwa kuma ɗan siyasa wanda ya sadaukar da rayuwarsa wajen hidimtawa al'umma.

Matar Tsohon Sanata Ta Rasu

Kara karanta wannan

Muje Zuwa: Shehu Sani Ya Bayyana Jam'iyyar Da Za Ta Ci Ribar Rikicin Siyasar Da Ke Tsakanin Gwamnan PDP Da Mataimakinsa

A wani labarin kuma, kun ji cewa tsohon sanatan Edo ta Arewa, Francis Alimikhena, ya yi babban rashi a rayuwarsa bayan matarsa ta riga mu gidan gaskiya.

Monica Francis Alimikhena ta yi bankwana da duniya ne a ranar Alhamis, 31 ga watan Agustan 2023.

Asali: Legit.ng