Allah Ya Yi Wa Mai Martaba Yariman Gombe Rasuwa Yana Da Shekara 77

• An shiga jimamin rashin mai girma Yariman Gombe, Alhaji Abdulkadir Abubakar Umar, wanda ya koma ga mahaliccinsa
• Marigayi Alhaji Abdulkadir Abubakar Umar, ya yi bankwana da duniya ne a ranar Talata, 1 ga watan Yulin 2023 a gidansa dake Tudun Wada a birnin Gombe
• Marigayin wanda ya rasu yana da shekara 77 a duniya, ya rasu ne bayan ya kwashe dogon lokaci yana jinyar rashin lafiyar da yake fama da ita

Jihar Gombe - Yariman Gombe, Alhaji Abdulkadir Abubakar Umar, ya yi bankwana da duniya a ranar Talata, 1 ga watan Agustan 2023.

Jaridar Aminiya ta kawo rahoto cewa marigayi Alhaji Abdulkadir ya rasu ne a gidansa dake unguwar Tudun Wada a birnin Gombe babban birnin jihar Gombe, a ranar Talata da yamma ana dab da shiga sallar Magriba.

Kara karanta wannan

Ministocin Tinubu: Sanatan Kogi Ya Nemi Tayarwa Da El-Rufai Hankali Yayin Tantacewa a Majalisa

Marigayi Yariman Gombe ya rasu bayan ya yi fama da jinya

Marigayi Yariman na Gombe ya yi bankwana da duniya ne bayan ya yi fama da jinya wacce ta ɗauki lokaci mai tsawo yana fama da ita.

Marigayi mai girma Alhaji Abdulkadir ya bar duniya yana da shekara 77 a duniya sannan ya bar matan aure guda biyu da ƴaƴa.

Kafin marigayin ya bar duniya, shi ne yake riƙe da sarautar Yariman Gombe, kuma babban Hakimin cikin garin Gombe da kewayensa.

Haka kuma, marigayin yana da matsayin Baffa a wajen Sarkin Gombe, Alhaji Abubakar Shehu Abubakar III.

Za a gudanar da jana’izarsa kamar yadda addinin musulunci ya tanadar a ranar Laraba, 2 ga watan Agustan 2023, a ƙofar fadar Mai Martaba Sarkin Gombe, Alhaji Abubakar shehu Abubakar III, da misalin ƙarfe 2:00 na rana.

Babban Basarake Mai Lamba 1 Ya Rasu a Jihar Nasarawa

Kara karanta wannan

Shehu Sani Ya Fadi Manyan Dalilai 13 Da Bai Kamata ‘Yan Najeriya Su Goyi Bayan Mamayar Jamhuriyar Nijar Ba

A wani labarin na daban kuma, an shiga jimamin rashin wani babban basarake mai daraja lamba ta ɗaya a jihar Nasarawa dake yankin Arewa ta Tsakiya.

Alhaji Aliyu Daudu, babban basarake mai daraja ta ɗaya a Gadabuke cikin yankin Gadabuke na ƙaramar hukumar Toto a jihar Nasarawa ya riga mu gidan gaskiya.

Alhaji Aliyu Daudu ya gamu da ajalinsa ne inda ya yi bankwana da duniya yana da shekara 96 ranar Litinin, 24 ga watan Yulin 2023.

Asali: Legit.ng