Jerin Takwarorin Shugaba Tinubu Gwamnonin 1999 Da Aka Taba Garkame Wa

A ranar Laraba, 12 ga watan Yuli, Shugaba Bola Tinubu ya gana da takwarorinsa gwamnoni na shekarar 1999 a fadar shugaban ƙasa da ke birnin tarayya Abuja.

Tawagar tsaffin gwamnonin dai su ne na farko da aka fara zaɓa tun bayan dawowar mulkin dimokuraɗiyya a shekarar 1999, bayan an kwashe shekara 16 ana mulkin soja.

Shugaba Bola Tinubu yana daga cikin ƴan siyasar da aka zaɓa a matsayin gwamna a shekarar ta 1999. Shekara 20 bayan zaɓensu, abubuwa da dama sun faru da su ciki har da waɗanda aka garkame a gidan gyaran hali.

Ga jerin waɗanda suka taɓa yin zaman gidan kaso daga cikinsu wanda Legit.ng ta tattaro:

James Ibori

Ibori shi ne zaɓaɓɓen gwamnan jihar Delta daga shekarar 1999 zuwa 2007.

Kara karanta wannan

Tashin Hankali Yayin Da 'Yan Bindiga Suka Halaka Babban Dan Majalisa a Wata Jiha

An cafke shi inda aka tuhume shi da laifukan cin hanci kusan 170, amma wata babbar kotu a birnin Asaba ta wanke shi a shekarar 2009.

Kotun Southwark Crown a UK ta ɗaure tsohon gwamnan har na shekara 13 a gidan kaso bisa safarar haramtattun kuɗaɗe. Bayan shekara huɗu a gidan kaso, an sake shi bayan umarnin kotu a shekarar 2016.

Jolly Nyame

An zaɓe shi a matsayin gwamnan jihar Taraba a shekarar 1999 inda ya yi mulkin jihar har sau biyu wanda ya ƙare a shekarar 2007.

Hukumar EFCC ta cafke Jolly Nyame kan zargin cin hanci na N1.64bn. An yanke masa hukuncin shekara 12 a gidan kaso a shekarar 2018.

Joshua Dariye

Dariye an zaɓe shi a matsayin gwamnan jihar Plateau a shekarar 1999 a ƙarƙashin inuwar jam'iyyar Peoples Democratic Party (PDP), amma an tsige shi shekara uku bayan ya koma mulkin jihar a karo na biyu.

Kara karanta wannan

Shugaba Tinubu Har Yanzu Bai Tare a Gidansa na Villa Ba, An Bayyana Muhimmin Dalilin Da Ya Janyo Hakan

Hukumar EFCC ta tuhumi Dariye da zarge-zarge 23 kan safarar kuɗin haram, a ranar 12 ga watan Yulin 2018, an yanke masa hukuncin shekara 10 a gidan kaso.

Tinubu Ya Gana Da Takwarorinsa Gwamnonin 1999

Rahoto ya zo cewa Shugaban ƙasa Bola Ahmed Tinubu ya gana da tawagar gwammnonin da aka zaɓa a shekarar 1999.

Shugaba Tinubu wanda yana daga cikin gwamnonin da aka zaɓa a shekarar 1999 ya gana da takwarorin nasa ne a birnin tarayya Abuja.

Asali: Legit.ng