Jam’iyyar APC a Kananan Hukumomi 2 Sun Amince da Korar Tsohon Gwamnan Gombe Goje

• Jam’iyyar APC a kananan hukumomin Akko da Yamaltu Deba sun amince da korar Goje daga jam’iyyar
• Wannan na zuwa ne bayan da aka zarge shi da cin dunduniyar jam’iyyar a zaben da ya gabata a kasar nan
• Ba Goje kadai ba, jam’iyyar APC ta kori dan majalisar wakilai mai wakiltar karamar hukumar Yamaltu Deba

Jihar Gombe - Jam’iyyar APC a kananan hukumomin Akko da Yamaltu Deba a jihar Gombe ta goyi bayan matakin sashenta na Kashere wajen korar sanata Danjuma Goje daga cikinta.

Idan baku manta ba, jam’iyyar APC a Kashere, mahaifar Goje ta kori sanatan wanda ya kasance tsohon gwamnan jihar Gombe bisa zarginsa da cin dunduniyarta a zaben bana.

Koran Goje na zuwa ne ta bakin shugaban APC na Kashere, Abdullahi Tanimu a cikin wani bidiyon da ya yadu a kafar sada zumunta, rahoton Punch.

Kara karanta wannan

APC Ta Dakatar Da Zababben Sanata, Ta Kori Dan Takarar Gwamna, Ta Fadi Dalili

A cewar Tanimu, sun kori Goje ne bayan da ya ki halartar zaman kwamitin da suka shirya don yi masa titsiye game da tasirinsa na yiwa APC barin makauniya a zaben na bana.

Meye alakar Goje da kananan hukumomin nan biyu?

Akko da Yamaltu Deba ne kananan hukumomin da sanata Goje ke wakiltar a majalisar dattawa ta Najeriya.

Da yake jaddada matsayarsa kan matakin ‘yan APC a Kashere, sakataren APC na Yamaltu Deba, Birma Haruna ya ce, bayan ganawarsa da shugabanta Ali Ismaila, ya ce ba za su ci gaba jure halin Goje ba.

Haruna ya kuma ce, ayyukan cin dunduniyar APC da Goje ya yi a bayyane suke, inda ya kara da cewa, ‘yan APC a Kashere sun yi daidai.

Hakazalika, a bayaninsa, Haruna ya ce APC ta kuma kori wasu manyan jiga-jiganta a Lugbo, ciki har da dan majalisa mai wakiltar Yamaltu Deba a majalisar wakilai, Yunusa Abubakar.

Kara karanta wannan

Zaben Majalisa: An Bar APC Da Ciwon Kai, Mutanen Arewa Maso Yamma Sun Huro Wuta

APC a Akko, mahaifar Goje ta yi watsi dashi, ta amince da korarsa

A bangare guda, shugabancin APC a karamar hukumar Akko karkashin shugabancin Usman Ahmed da sakatarenta Aliyu Audu sun goyi bayan koran Goje daga jam’iyyar, rahoton Daily Independent.

A cewarsa:

“Sanatanmu, Muhammad Danjuma Goje, ya ci dunduniyar jam’iyyar sau da yawa. An kira shi sau uku domin ya zo ya kare kansa game da tuhumar amma ya ki.

“Abin da muke cewa shine sanata Goje ba mamban APC bane kuma duk wani mamban da ya nuna rashin da’a ko kuma ya ci dundundiyar jam’iyya zai fuskanci irin wannan hukuncin.”

Rahotonmu na baya ya kawo yadda aka kai ruwa rana har aka kori Goje daga jam'iyyar ta APC mai mulkin kasa.

Asali: Legit.ng