Inna lillahi Wa inna Ilaihi Rajiun, Mahaifiyar Sheikh Ahmad Gumi Ta Rasu

• Inna Lillahi wa inna ialihi raji'un, kowace rai zata ɗanɗani mutuwa, Allah ya yi wa mahaifiyar Sheikh Ahmad Mahmud Gumi rasuwa
• Fitaccen Malamin ya bayyana cewa ta rasu ne da misalin karfe 5:30 na yamma yau Lahadi 5 ga watan Maris, 2023
• Za'a mata Jana'iza gobe Litinin da Azahar a kofar gidan marigayi Sheikh Abubakar Mahmud Gumi da ke Unguwan Sarki Kaduna

Kaduna - Mahaifiyar fitaccen Malamin addinin Musuluncin nan na jihar Kaduna, Sheikh Ahmad Mahmud Gumi, ta riga mu gidan gaskiya.

Bayanai sun nuna cewa mahaifiyar Malamin ta rasu ne a wani Asibiti dake birnin tarayya Abuja da yammacin yau Lahadi, 5 ga watan Maris, 2023.

Shehin Malamin ya tabbtar da rasuwar mahaifiyarsa a shafinsa na dandalin sada zumunta Facebook. Ya ce ta rasu da misalin ƙarfe 5:30 na yamma.

Kara karanta wannan

Yanzu Yanzu: Hawaye Sun Kwaranya Yayin da Tsohon Dan Majalisar Oyo Ya Mutu Bayan Yar Gajeruwar Rashin Lafiya

Sheikh Gumi ya ce:

"Inna Lillahi Wa Inna Ilaihi Raji'un, da zuciya mai rauni nake sanar da rasuwar mahaifiyata, yau da misalin karfe 5:30 na yamma. Dan Allah ku tama ni roka mata gafara da rahamar Allah."

"Kalamai na karshe da ta faɗa mun mako uku da suka gabata; In Sha Allah, Allah zai sanya ta da 'ya'yanta da jikokinta wuri ɗaya a cikin gidan Aljannah."

"Waɗan nan kalmomi suna kwantar mun da hankali, Allah ya tabbatar da rahamarsa a gareta, Amin."

Za'a mata Janaza Gobe Litinin

Wata sanarwa mai biye wa wannan a shafin Malamin na Facebook ta ce za'a yi Jana'iza gobe Litinin 6 ga watan Maris, 2023 a ƙofar gidan Marigayi Sheikh Abubakar Mahmud Gumi.

Sanarwan ta ƙara da bayanin cewa za'a gabatar da Jana'iza da Azahar misalin karfe 1:00 a gidansu da ke Anguwar Sarki, GRA bayan Lugard Hall cikin garin Kaduna.

Kara karanta wannan

Karin Bayani: Yan Bindiga Sun Harbe Basarake Har Lahira a Jihar Kano

A wani labarin kuma Ɗan marigayi shugaban Najeriya a zamanin mulkin Soja, Sani Abacha, ya riga mu gidan gaskiya a Abuja

Abdullahi Abacha, wanda daga shi sai autan tsohon shugaban kasan ya rasu yana da shekaru 36 da haihuwa a duniya.

Bayanai daga iyalan gidan marigayin sun nuna cewa Abdullahi ya rasu ne a cikin barcinsa a gidansa da ke Abuja.

Asali: Legit.ng