Yanzu Yanzu: Gwamnan Jigawa Ya Bayyana Sabon Sarkin Dutse
- Yan kwanaki bayan rasuwar tsohon Sarki Nuhu Muhammad Sunusi, Muhammad Hameem ya zama sabon Sarkin Dutse
- Gwamna Badaru Abubakar ya amince da nadin Muhammad Hameem daga cikin mutane uku da suka nemi takarar kujerar
- Kafin tabbatar da shi, masu zaben sarki sun aika sunansa majalisar sarakuna ta jihar inda suma suka yi mubaya'a
Jigawa - Gwamna Muhammad Badaru Abubakar na na jihar Jigawa ya amince da nadin Muhammad Hameem a matsayin sabon sarkin Dutse.
Muhammad Hameem ya gaji Sarki Nuhu Muhammad Sunusi, wanda ya kwanta dama a makon jiya a wani asibitin Abuja, Daily Trust ta rahoto.
Asali: UGC
Mutum uku ne suka yi takarar kujerar
Jaridar ta tattaro cewa masu nada sarki a masarautar Dutse sun hada kai sun zabi sabon sarkin cikin masu takarar kujerar sarautar guda uku.
DUBA: Bibiyemu a Instagram don samun labarai masu muhimmanci kai tsaye cikin manhajar
Wata sanarwa daga majalisar masarautar ta ce an mika sunan sabon sarkin majalisar sarakunan jihar Jigawa wacce ita ma ta amince da hukuncin masu nada sarkin
Bayan nan majalisar sarakunan ta mika sunayen Muhammad Hameem da sauran yan takarar biyu ga gwamnan jihar don samun yardarsa, rahoton Aminiya.
Sanarwar ta ce:
"Daga baya gwamnan ya amince da nadin Muhammad Hameem Nuhu Sanusi a matsayin sabon sarkin Dutse wanda ya fara aiki daga yau 05/02/2023.”
An yi jana'izar marigayi sarkin Dutse, Alhaji Nuhu Muhammad Sunusi
Idan za ku tuna, a ranar Laraba, 1 ga watan Fabrairu ne aka yi jana'izar mariyi sarkin Dutse, Alhaji Nuhu Muhammad Sanusi, inda aka sada shi da gidansa na gaskiya.
Taron jana'izar marigayin ya samu halartan manyan sarakunan Arewa ,manyan yan siyasar Najeriya, manyan malaman addini da kuma yan'uwa da abokan arziki.
Basaraken kasar yarbawa ya zama dan fim
A wani labari na daban, mun ji cewa babban basaraken kasar Yarbawa, Ooni na Ife, Oba Adeyeye Ogunwusi, ya bayyana a cikin wani shirin fim na masana'antar shirya fina-finai ta kasar Amurka wato Hollywood.
A cikin shirin fim din mai suna ‘Take Me Home’, Oba Adeyeye Ogunwusi ya fito ne a matsayinsa na sarki wato Ooni na Ife. Kuma shahararren fim din wanda ake kyautata zaton zai kayatar da jama'a ya fito da abubuwan tarihi na hakika.
Asali: Legit.ng
