Jagorori da Kwamandojin Iran 10 da Aka Kashe tun Bayan Fara Yaki da Amurka, Israila
Birnin Tehran, Iran - Amurka da Isra'ila sun kaddamar da hare-hare kan Jamhuriyar Musulunci ta Iran a ranar Asabar, 28 ga watan Maris 2026.
Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi
Hare-haren sun yi sanadiyyar kashe jagoran addini na Iran Ali Khamenei da wasu manyan jami'an siyasa da na soja na kasar.
Source: Getty Images
Legit Hausa ta tattaro wasu daga cikin manyan jagororin Iran da Amurka da Isra'ila suka kashe tun bayan fara yakin.
An kashe kwamandoji da jagori a Iran
Hare-haren dai sun jawo an hallaka manyan jami'an gwamnati da kwamandojin Iran.
Amma wasu manyan jami'ai sun tsira kuma jamhuriyar Musulunci ta nuna juriya wajen maye gurbin shugabannin da aka kashe cikin sauri, sannan tana ci gaba da yaƙi da Amurka da Isra'ila.
1. Ayatollah Ali Khamenei
Ayatollah Ali Khamenei, wanda shi ne jagoran addini na Iran tun 1989, an kashe shi ne a lokacin farko na yaƙin a ranar 28 ga Fabrairun 2026 a wani hari kan taron manyan jami'ai a Tehran.
Source: Twitter
Harin ya kashe surukarsa, ɗiyarsa, da aƙalla jikansa guda ɗaya, kamar yadda rahoton tashar Aljazeera bayyana.
Ɗansa Mojtaba Khamenei, wanda ba ya cika fitowa fili, ya tsira, kodayake an ba da rahoton cewa ya samu raunuka kuma ya karɓi ragamar shugabancin Iran.
2. Ali Larijani
Shugaban majalisar tsaron kasa, Ali Larijani, ya rasa ransa a wani hari da Isra'ila ta kai domin kashe shi.
Source: Twitter
Kisan Ali Larijani, wanda ba malamin addini ba ne amma jigo ne a gwamnatin Iran na tsawon shekaru da dama, watakila shi ne rashi mafi girma ga jamhuriyar Musulunci bayan mutuwar Ali Khamenei.
An kashe Ali Larijani a ranar 17 ga Maris 2026 a wani harin Isra'ila, wanda aka kai a yankin Tehran kuma ya kashe ’yan uwan sa, jaridar The Guardian ta kawo labarin.
Mako guda kafin nan, ya fito fili a Tehran a wani taron nuna goyon baya ga gwamnati.
3. Mohammad Pakpour
Babban Kwamandan rundunar IRGC, Mohammed Pakpour, ya rasa ransa a harin da Isra'ila ta kai kan Iran, tashar NDTV ta kawo labarin.
Source: Getty Images
Pakpur wanda a baya shi ne shugaban dakarun ƙasa na IRGC, ya jagoranci rundunar tun watan Yunin 2025 lokacin da aka kashe tsohon babban kwamanda Hossein Salami a yaƙin kwanaki 12 da Isra'ila ta yi da Iran.
An kashe shi a ranar farko na yaƙin kuma tsohon Ministan cikin gida da tsaro Ahmad Vahidi ya maye gurbinsa.
4. Ali Shamkhani
Mai ba jagoran addini na Iran shawara, Ali Shamkhani, na daga cikin manyan jagororin da Isra'ila ta hallaka.
Source: Getty Images
Ali Shamkhani wanda jigo ne a dakarun jamhuriyar Musulunci tun shekarun 1980, an kashe shi a wani harin sama a ranar farko ta yaƙin, jaridar Iran International ta kawo rahoton.
5. Esmael Khatib
Ministan leken asiri na Iran, Esmael Khatib, ya rasa ransa a wani harin da Isra'ila ta kai.
Source: Twitter
An kashe Esmael Khatib ne yayin wani harin Isra'ila a Tehran da sanyin safiyar 18 ga Maris 2026, kamar yadda sanarwar da IDF ta sanya a shafinta na X ta nuna.
Ya kasance Ministan leken asiri na Iran tun shekarar 2021, kafin kisan da aka yi masa.
6. Aziz Nasirzadeh
Ministan tsaron Iran, Aziz Nasirzadeh, wanda kwararre ne tun yaƙin Iran da Iraki a shekarun 1980, ya yi aiki a matsayin Ministan tsaro tun 2024.
Source: Getty Images
Jaridar Iranwire ta ce Aziz Nasirzadeh ya rasa ransa ne tun harin farko da Isra'ila ta kai kan Iran lokacin da aka fara yakin a karshen watan Fabrairun 2026.
7. Gholamreza Soleimani
Babban kwamandan dakarun Basij, Gholamreza Soleimani, ya shiga sahun kwamandojin Iran da Isra'ila ta kashe.
Source: Getty Images
Gholamreza Soleimani wanda ya jagoranci dakarun Basij, da ke karkashin IRGC an kashe shi a wani harin sama a ranar 17 ga Maris 2026.
Rundunar IDF ta tabbatar da kashe Gholamreza Soleimani a shafinta na X a ranar Talata, 17 ga watan Maris 2026.
8. Ali Mohammad Naeini
Isra'ila ta hallaka Mai magana da yawun rundunar IRGC, Ali Mohammad Naeni, yayin wani hari da ta kai.
Source: Getty Images
Rundunar IDF ta Isra'ila ta bayyana a shafinta na X cewa ta kashe Ali Mohammad Naini a ranar Juma'a, 20 ga watan Maris 2026.
9. Mohammad Shirazi
Mohammad Shirazi shi ne shugaba mai kula da bangaren sojoji a ofishin jagoran addini na Jamhuriyar Musulunci ta Iran.
Source: Getty Images
Yana da babban aiki na haɗa kai tsakanin rassa daban-daban na jami'an tsaron Iran a ofishin jagoran addini.
Ya rasa ransa ne yayin harin farko da Isra'ila ta kai a ranar Asabar, 28 ga watan Maris 2026, jaridar Euronews ta kawo labarin.
10. Abdolrahim Mousavi
Abdolrahim Mousavi shi ne shugaban rundunar sojojin Iran kuma an kashe shi a ranar farko na yaƙin, shafin abc.net.au ya kawo labarin.
Source: Getty Images
Ya karɓi muƙaminsa ne a watan Yunin 2025 biyo bayan mutuwar wanda ya gada Mohammad Bagheri a yaƙin kwanaki 12.
Iran ta kai hare-hare kan Isra'ila
A wani labarin kuma, kun ji cewa Iran ta kaddamar da sababbin hare-haren ramuwar gayya kan kasar Isra'ila.
Rundunar IRGC ta sanar da ƙaddamar da rukuni na 78 na hare-haren ramuwar gayya na "Operation True Promise 4".
IRGC ta bayyana cewa ta kai harin ne kan muhimman wurare a Isra'ila kamar Dimona, Tel Aviv, da Eilat, gami da sansanonin sojojin Amurka da dama a yankin.
Wanda ya tantance Muhammad Malumfashi, babban edita a Legit.ng.
Asali: Legit.ng
