Yadda ranar 15 ga watan Junairun 1966 da 1970 suka canza tarihi har abada

A rana irin ta yau ne a shekarar 1966, aka yi juyin-mulkin farko a Najeriya, wanda ya yi sanadiyyar mutuwar shugabannin da ke mulki a wancan lokaci.

A wannan rana wasu sojoji masu dumin-kirji, wanda kusan dukkanninsu sun fito ne daga kabilar Ibo ne, suka hambarar da gwamnatin Abubakar Tafawa-Balewa.

Wadanda suka jagoranci wannan danyen aikin kashe Firayim Minista da Firimiyoyin larduna su ne: Chukwuma Kaduna Nzeogwu da Emmanuel Ifeajuna.

Sai kuma Timothy Onwuatuegwu, Chris Anuforo, Don Okafor, Humphrey Chukwuka, da Adewale Ademoyega.

Ko da sojojn tawayen sun kashe manyan sojoji da ‘yan sanda da kuma shugabannin gwamnati, amma hakarsu ba ta cinma ruwa na darewa kan mulki ba.

Janar Johnson Aguiyi-Ironsi ya ga bayan wannan juyin-mulki, kuma ya hau kan kujerar shugaban kasa na mulkin soja, wanda shi ne karon farko a tarihi.

KU KARANTA: Takaitaccen tarihin mutuwar shahadar Ahmadu Bello a 1966

Lamarin ya yi sanadiyyar mutuwar Janar JTU Aguiyi-Ironsi, inda sojojin Arewa suka shirya ramuwar gayya, su ka zargi gwamnati da kin hukunta masu laifi.

Wannan ne ya jawo kisan Inyamurai a Najeriya, a karshe gwamna Emeke Ojukwu ya jagoranci kabilar ta barke daga Najeriya, ta kafa kasar Biyafara mai ‘yancin kanta.

Bayan shekaru uku ana gwabza yaki tsakanin 1967 zuwa 1970, Ojukwu ya tsere, sojojin Biyafara suka sallama a rana mai kamar ta yau - 15 ga watan Junairu, 1970.

Ga jerin wasu daga cikin wadanda aka kashe a juyin mulkin kamar yadda Wikipedia ya kawo:

KU KARANTA: Kisan Sardauna, Tafawa Balewa, da abubuwan da suka faru a 1966

Firayim Minista, Abubakar Tafawa Balewa

Firimiyan Arewa, Ahmadu Bello da Mai dakinsa, Hafsatu

Firimiyan Yamma, Samuel Ladoke Akintola

Ministan kudi, Festus Okotie-Eboh

Latifat Ademulegun

Dogari, Zarumi Sardauna

Ahmed Pategi (Direba)

Jami’an tsaron da aka kashe sun hada da:

Birgediya Samuel Ademulegun

Birgediya Zakariya Maimalari

Kanal Ralph Shodeinde

Kanal Kur Mohammed

Laftanan Kanal Abogo Largema

Laftanan Kanal James Pam

Laftanan Kanal Arthur Unegbe

Sannan akwai Sajan Daramola Oyegoke, PC Yohana Garkawa, Lans Kofur, Musa Nimzo, PC Akpan Anduka, PC Hagai Lai da Philip Lewande.

Idan ku na da wata shawara ko bukatar bamu labari, tuntube mu a: labaranhausa@corp.legit.ng

Latsa wannan domin samun sabuwar manhajar labarai ta Legit.ng Hausa a wayar ku ta hannu: https://play.google.com/store/apps/details?id=com.naij.hausa&hl=en

Ku biyo mu a shafukanmu na dandalin sada zumunta:

Facebook: https://facebook.com/legitnghausa

Twitter: https://twitter.com/legitnghausa

Asali: Legit.ng