Messi ya doke Ronaldo, ya zama ‘Dan kwallon da ya fi kowa samun arziki

Messi ya doke Ronaldo, ya zama ‘Dan kwallon da ya fi kowa samun arziki

An bayyana Lionel Messi a matsayin ‘dan wasan kwallon kafan da ya fi kowa kudi – Hakan ya na nufin ‘dan wasan ya sha gaban Cristiano Ronaldo.

France Football ta tattaro sunayen ‘yan kwallon Duniya da su ka fi arziki a shekarar 2019. An samu Lionel Messi da Cristiano Ronaldo a kan sahun gaba.

Lionel Messi ya samu fam miliyan £120 a shekarar da ta gabata, wannan kudi ya zarce abin da Cristiano Ronaldo ya samu a Juventus da fam miliyan £11.

A cikin ‘yan kwallon kafa, Taurarin nan biyu ne kawai su ka tara abin da ya haura fam miliyan £100 a shekara guda daga albashi, alawus da harkar talla.

‘Dan wasan kungiyar PSG, Neymar Jr. wanda ya tada kai da £87m a bara shi ne ya zo na uku a jerin. Akwai tazarar akalla fam £22m tsakaninsa da Ronaldo.

KU KARANTA: 'Dan wasan Barcelona ya kamu da COVID-19

Messi ya doke Ronaldo, ya zama ‘Dan wasan kwallon da ya fi kowa arziki
Tauraron Barcelona Messi ya zarce Ronaldo a yawan dukiya
Asali: Getty Images

Gareth Bale wanda ya ke fuskantar barazana a Real Madrid shi ne na hudu a wannan jeri. A shekarar bara ‘dan wasan na kasar Wales ya tara £35.45m.

Antoine Griezmann wanda ya tashi daga Madrid zuwa Barcelona ya samu shiga cikin sahun attajiran ‘yan wasa biyar na Duniya da kimanin fam £35.25m.

Ragowar ‘yan wasan da mu ke tunanin su na biye a bayan wadannan taurari su ne Raheem Sterling na Liverpool, Kylian Mbappe, na PSG da Eden Hazard.

Ga dai yadda jerin ya ke:

1. Lionel Messi - £120m

2. Cristiano Ronaldo - £109m

3. Neymar - £87m

4. Gareth Bale - £35.45m

5. Antoine Griezmann - £35.25m

6. Eden Hazard - £32.06m

7. Andres Iniesta - £31.14m

8. Raheem Sterling - £30.96m

9. Robert Lewandowski - £26.56m

10. Kylian Mbappe - £24.73m

A jiya kuma aka ji cewa kungiyar Leipzig ta bada mamaki, ta yi waje da Atletico Madrid daga gasar Zakarun Turai da ci 2-1.

Idan ku na da wata shawara ko bukatar bamu labari, tuntube mu a: labaranhausa@corp.legit.ng

Latsa wannan domin samun sabuwar manhajar labarai ta Legit.ng Hausa a wayar ku ta hannu: https://play.google.com/store/apps/details?id=com.naij.hausa&hl=en

Ku biyo mu a shafukanmu na dandalin sada zumunta:

Facebook: https://facebook.com/legitnghausa

Twitter: https://twitter.com/legitnghausa

Asali: Legit.ng

Online view pixel