Shugabannin NNPP na Jihohin 6 Sun Yi Magana kan Jagorancin Kwankwaso

• Shugabannin NNPP na jihohi shida sun musanta raɗe-raɗin da ke yawo cewa jam'iyyar ta dare gida biyu saboda rikicin cikin gida
• A wata sanarwa da suka fitar a Fatakwal, sun bayyana cewa NNPP a dunƙule take karƙashin jagorancin Ajuji Ahmed da jagora Rabiu Kwankwaso
• Sun ce tsagin Agbor Major da sauran ƴan tawagarsa ba ƴan NNPP ba ne domin an jima da korarsu daga jam'iyya

Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum

Rivers - Kungiyar shugabannin NNPP na jihohin Kudu ta yi watsi da rahotannin da ake yaɗawa cewa jam'iyya na fama da rigingimun cikin gida.

Ciyamonin NNPP na jihohin Kudu maso Kudu ne suka karyata jita-jitar a wata sanarwa da suka rabawa manema labarai a Fatakwal, jihar Ribas.

Vanguard ta ruwaito cewa sanarwar na ɗauke da sa hannun shugaban NNPP na Akwa Ibom, Inemisit Akpan da takwarorinsa na jihohin Delta, Edo, Bayelsa, Ribas da Kuros Riba.

Kara karanta wannan

"Mutane za su ji daɗi," An buƙaci Tinubu ya dawo da farashin fetur N300 na watanni 2

Ciyamomin NNPP na tare da Kwankwaso

Ƙungiyar ciyamomin ta kara da cewa raɗe-raɗin da ke yawo cewa rikici ya ɓarke a NNPP ba gaskiya ba ne, wasu makiyan jam'iyyar ne ke neman tada hankali.

Ta ce NNPP na nan a dunkule karkashin shugabancin Dr. Ajuji Ahmed da kuma jagoran jam'iyyar na kasa, Sanata Rabiu Musa Kwankwaso, cewar Daily Post.

Shugabannin NNPP sun yi fatali da tsagin Major

A sanarwar, shugabannin NNPP na jihohi shida suka ce:

"Babu wani rikici da ke faruwa a NNPP kuma mutanen da ake ta surutu a kansu Dr. Bonfiace Okechukwu Aniebonam, Dr. Agbo Gilbert Major, Mr. Oginni Olaposi da sauransu ba ƴan jam'iyya ba ne."

"Dukkansu an kore su daga NNPP tun tuni kuma a halin yanzu ba su da ikon bayyana kansu a matsayin ƴan jam'iyya. Muna ƙara jaddada cewa babu wani tsagi a NNPP.

"A dunƙule muke wuri ɗaya karkashin jagorancin Dr. Ajuji Ahmed da sauran ƴan kwamitin gudanarwa watau NWC."

Kara karanta wannan

Wasu Gwamnoni 15 sun shiga taro a Abuja kan kudirin harajin Bola Tinubu

NNPP ta rasa wasu jiga-jigai a Kano

Kun ji cewa tsohon kansilar mazabar Sanata Rabiu Kwankwaso, Yahaya Sa’idu da wasu jiga-jigan NNPP sun sauya sheka zuwa APC.

Hakazalika, an samu wasu kusoshin jam'iyyar PDP daga karamar hukumar Dawakin Kudu sun koma jam'iyyar APC a Kano.

Asali: Legit.ng