"Dan Allah Ka Hakura," Jigon PDP Ya Ba Atiku Shawara kan Takarar Shugaban Kasa a 2027

• Jigon PDP, Bode George ya bukaci tsohon mataimakin shugaban ƙasa, Atiku Abubakar ya hakura da takara a zaben 2023
• George, tsohon mataimakin shugaban PDP ya ce lokaci ya yi da Atiku zai koma gefe bayan shekaru 31 yana neman mulkin Najeriya
• Ya ce Atiku na cikin waɗanda suka taimakawa Bola Ahmed Tinubu ya samu nasara a zaɓen shugaban kasa na 2023

Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum

Lagos - Tsohon mataimakin shugaban jam’iyyar PDP na kasa, Cif Bode George ya bukaci Atiku Abubakar ya hakura da burinsa na zama shugaban kasa.

Geroge ya kuma shawarci tsohon mataimakin shugaban ƙasar ya koma gefe, ka da ya nemi tsayawa takara a babban zaɓen 2027 mai zuwa.

2027: Jigon PDP ya buƙaci Atiku ya hakura

Jigon PDP ya bayyana haka ne a wani taron manema labarai a jihar Legas jiya Alhamis, 21 ga watan Nuwamba, kamar yadda Vanguard ta ruwaito.

Kara karanta wannan

'Za a kore shi daga Villa': Jagoran PDP ya hango abin da zai faru da Tinubu a 2027

Ya ce tun 1993 Atiku ke neman zama shugaban ƙasa kuma har yau Allah bai ba shi nasara ba, dok haka lokaci ya yi da zai yi wa kansa karatun ta natsu.

Bode George ya ƙara da cewa jam'iyyar PDP ba ta mutum ɗaya ba ce don haka ya kamata Atiku ya matsa ya ba wasu dama su gwada sana'arsu.

"Atiku ya taimaki Tinubu a 2023" - George

A ruwayar Punch, Bode George ya ce

"A lokacin kakar zaɓen 2023, na fito na yi ta magana kan rikicin da ya ɓarke wanda ya samo daga burin Atiku, Iyorchia Ayu, David Mark da wasu.

"Yanzu ina Ayu? Ina ganin Atiku da Ayu ne suka share wa Bola Tinubu hanya ya zama shugaban ƙasa. Meyasa Atiku ya ƙagu ne? Ba za mu bari a rusa jam'iyyarmu ta PDP ba.

" Shawarar da zan ba Atiku ita ce a 2027 zai cika shekara 81 a duniya kuma tun 1993 yake neman kujrar shugaban ƙasa, lokaci ya yi da zaka hakura, ina rokonka dan Allah ka haƙura haka nan."

Kara karanta wannan

'Akwai haɗari,' Atiku ya magantu da jin Najeriya ta kafa mummunan tarihi bashi

Jigon PDP maida martani

Wani ɗan PDP kuma ɗan amutun Atiku, Kabir Abdullahi, ya ce wannan duk surutu ne amma jam'iyya ta san ba mai iya kayar da APC sai Atiku.

Jigon PDP ya shaidawa wakilin Legit Hausa cewa dama George na cikin waɗanda ba su kaunar Wazirin Adamawa kuma ba ya ɓoye adawarsa.

A cewarsa, duk da abubuwan da ke faruwa a cikin gida amma duk ɗan PDP daga sama har ƙasa ya san Atiku ne kaɗai zai iya fafatawa da Tinubu.

Kabir ya ce:

"Ban so cewa komai ba kan wannan kalaman na Bode George ba saboda dama mun san ba ya son Atiku, ni ina ganin da ni da shi da sauran ƴan jam'iyya mun san gaskiya.

"A yanzu dai PDP ba ta da wani ɗan takara da zai iya gwabzawa da APC kuma ya samu nasara, ko a 2023 rabuwar kai ce ta ja mana, Atiku da Obi duk ƴan PDP ne.

Kara karanta wannan

"Alakar Wike da Tinubu ba ta dame mu ba," Sanata Abba ya faɗi abin da PDP ta sa a gaba

"Da mun shiga zaɓen 2023 kamar yadda muka shiga a 2019 da yanzu ba wannan zancen ake yi ba, saboda haka mu haɗa kanmu, mu marawa Atiku baya, ina da yaƙinin Tinubu ba zai kai labari ba."

Atiku ya nuna damuwa da ciyo bashin Tinubu

A wani rahoton, kun ji cewa tsohon mataimakin shugaban kasa Atiku Abubakar ya nuna bacin rai kan yadda gwamnatin Bola Ahmed Tinubu ke ciwo bashi.

Atiku Abubakar ya ce abin takaici ne a cigaba da ciwo bashi bayan Najeriya ta zamo kasa ta uku da ta fi tarin bashi a fadin duniya

Asali: Legit.ng