Edo 2024: Ɗan Takarar PDP Ya Koka, Ya Hango Wata Matsala Ana Tsaka da Zabe
- Mai neman zama gwamna a inuwar PDP, Asue Ighodalo ya nuna damuwa kan yanayin tsaro a zaben da ke gudana a jihar Edo
- Ighodalo ya bayyana cewa ya samu labarin ƴan sanda sun cafke wani ɗan PDP da wasu mutane ɗauke da makamai a Uromi
- Yanzu haka dai zaɓe ya kankama a sassan jihar Edo duk da an samu jinkirin zuwan ma'aikatan INEC a akwatun ɗan takarar PDP
Legit.ng Hausa ta bude tasha a manhajar Whatsapp. Kasance tare da mu don samun rahotanni da dumi-dumi!
Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum
Edo - Dan takarar jam’iyyar PDP Asue Ighodalo ya koka kan barazanar tsaro a zaben gwamna da ke gudana yanzu haka a jihar Edo.
Ighodalo ya kuma yi zargin cewa ƴan sanda sun cafke wani ɗan jam'iyyarsa a gunduma ta 8 Uromi.
Asali: Facebook
Ighodalo ya yi zargin ana kama ƴan PDP
Channels tv ta haƙaito ɗan takarar PDP na cewa:
LURA: Shin kana son bamu labari da tattaunawa da marubutanmu? Tuntubemu a info@corp.legit.ng
"A Uromi 3, an kama daya daga cikin magoya bayan mu sa'a guda da ta gabata da wasu mutane dauke da bindigogi. Haramun ne wani ya je da makami wurin zaɓe, hakan ya saɓawa doka.
"Amma sai ka ga mutane suna nuna halin ko-in-kula, suna zaluntar jama’a da kuma kokarin tsoratar da magoya bayanmu,” inji shi.
Idan baku manta ba mun kawo muku rahoton cewa jami'an hukumar zaɓe INEC ba su hallara ba akwatun zaɓen ɗan takarar gwamna na PDP.
Ɗan takarar PDP ya kaɗa kuri'arsa
Asue Ighodalo ya kada kuri’arsa a makarantar firamare ta Indinrio, Unit 3, Ward 1, Okaigben Ewohimi a karamar hukumar Esan ta kudu maso gabas a jihar Edo.
Da yake jawabi ga manema labarai, Ighodalo ya ce yana da yakinin samun nasara idan ba a yi magudi a zaben ba, rahoton Daily Trust.
"Ina jin ana ta rade-radin cewa suna so su murde wannan zaɓe amma duba abin da muke gani, PDP ce za ta damu nasara.
"Ni za a bayyana a matsayin wanda ya samu nasara matukar aka yi ingantaccen zaɓe." in ji Ighodalo.
Edo: Ɗan takarar APC ya cika baki
A wani labarin kuma ɗan takarar jam'iyyar APC a zaɓen gwamnan jihar Edo, Sanata Monday Okpebholo, ya yiwa abokin hamayyarsa na PDP shaguɓe.
Okpebholo ya cika da baki kan cewa abokin hamayyarsa na PDP, Asue Ighodalo, ba zai samu ƙuri'a ko ɗaya ba a rumfar zaɓensa.
Asali: Legit.ng
