Abdulrahman Abdulrazaq Ya Lashe Zaben Gwamnan Kwara, Ya Yi Nasara A Dukkan Kananan Hukumomi 16

Hukumar zabe mai zaman kanta INEC, a ranar Lahadi ta ayyana Gwamna Abdulrahman Abdulrazaq na Jihar Kwara na jihar a matsayin wanda ya lashe zaben gwamna na jihar ta shekarar 2023.

Gwamnan ya yi nasarar lashe zabuka a dukkan kananan hukumomi 16 na jihar kamar yadda baturen zabe na jihar, Farfesa Isaac Itodo, shugaban jami'ar Makurdi, jihar Benue ya sanar.

Abdulrazaq wanda ya yi takara a karkashin jam’iyyar APC, ya lashe zaben gwamnan jihar da aka gudanar a ranar Asabar da ta gabata inda ya samu kuri’u 273,424 inda ya doke abokin karawarsa Yaman Abdullahi na jam’iyyar PDP wanda ya samu kuri’u 155,490 a zaben.

INEC, a daren ranar Asabar ta fara sanar da sakamakon zabukan inda ta sanar da na kananan hukumomi uku na Ekiti, Isin da Offa.

A lokacin da aka cigaba da sanar da sakamakon zaben a safiyar ranar Lahadi, aka cigaba har zuwa yamma, kuma daga bisani aka sanar gwamnan ya lashe sauran kananan hukumomi 13.

Ga sakamakon zaben dalla-dalla a kasa: