Jam'iyyar APC Ta Yi Sabon Shugaba Na Kasa bayan Gudanar da Zabe

• Jam'iyyar APC mai mulki a Najeriya ta gudanar da babban taronta na kasa domin zabar shugannin da za su ci gaba da jan ragamarta
• APC ta gudanar da babban taron ne a dandalin Eagles Square da ke Abuja a ranar Juma'a, 27 ga watan Maris 2026
• Tun da farko kafin gudanar da taron, jam'iyyar APC ta bayyana cewa za ta yi amfani da tsarin sulhu wajen zabar shugabanninta

​​​​​​​​​Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi

FCT, Abuja - Jam'iyyar APC mai mulki a Najeriya ta gudanar da babban taro don zabar shugabanni.

An zaɓi Nentawe Yilwatda da Ajibola Basiru a matsayin shugaban jam’iyya na ƙasa da sakataren jam’iyya na ƙasa na jam’iyyar APC.

Jaridar The Cable ta ce an zaɓi Yilwatda da Basiru ne a ranar Juma’a, 27 ga watan Maris a babban taro na huɗu na jam’iyyar APC da aka gudanar a dandalin Eagle Square da ke Abuja.

Kara karanta wannan

Gwamnoni 31, wakilai sama da 8,000 sun hallara a babban taron APC a Abuja

APC ta fitar da tsarin zabar shugabanni

Kwamitin zaɓe na babban taron jam’iyyar ya sanar da zaɓen nasu a matsayin ɓangare na jami’ai da dama da aka amince da su ta hanyar tsarin sulhu.

A makon da ya gabata, jam’iyya mai mulki ta ce za ta ci gaba da amfani da tsarin raba muƙamai da ake da shi yanzu don muƙaman kwamitin gudanarwa na ƙasa (NWC) yayin babban taron nata na ƙasa.

A cikin wata sanarwa, Felix Morka, sakataren yaɗa labarai na ƙasa na APC, ya ce wannan tsarin yana ƙunshe ne a cikin jadawalin taron gangami na ƙasa baki ɗaya, babban taron ƙasa, da sauran ayyukan da suka shafi hakan na shekarar 2026 da jam’iyyar ta wallafa.

Ya ce tsarin raba muƙaman na NWC a faɗin jihohi da ke cikin shiyyoyin ƙasar nan yana nan daram don babban taron.

Morka ya shawarci masu neman muƙaman ƙasa a jam’iyyar da su bi tsarin raba muƙaman daki-daki.

Kara karanta wannan

Kotu ta wanke tsohuwar minista daga zargin satar N2.5bn bayan ta daidaita da gwamnati Najeriya

Nentawe zai ci gaba da shugabantar APC

Sakamakon wannan shawara, an mayar da Yilwatda da Basiru kan muƙaman shugaba da sakataren jam'iyya na ƙasa ba tare da hamayya ba, rahoton tashar Channels tv ya tabbatar da hakan.

Babban taron ya samu halartar Shugaba Bola Tinubu, mataimakin shugaban kasa Kashim Shettima, shugaban majalisar dattawa Godswill Akpabio, shugaban majalisar wakilai, Tajudeen Abbas tare da sauran manyan jami’an jam’iyyar.

Kwamitin shirye-shirye ne ya shirya babban taron ƙarƙashin jagorancin Aminu Masari, tsohon gwamnan Katsina, da Anyim Pius Anyim, tsohon sakataren gwamnatin tarayya (SGF).

Hadimin Gwamna a Kaduna ya bar APC

A wani labarin kuma, kun ji cewa daya daga cikin hadiman Gwamna Uba Sani na jihar Kaduna ya ajiye aikinsa tare da ficewa daga jam'iyyar APC.

Honarabul Yusuf Umar Garkuwa, wanda ke rike da mukamin Mai ba Gwamnan Jihar Kaduna, Uba Sani, shawara na musamman, ya sanar da yin murabus daga mukaminsa.

Rahotanni sun bayyana cewa Garkuwa ya dauki wannan mataki ne bayan dogon nazari da tuntuba da mabiyansa da na kusa da shi.

Asali: Legit.ng