Tinubu zai Kafa Kamfani domin Rage Tsadar Abinci a 2025

• Shugaba Bola Tinubu ya bayyana cewa gwamnatin tarayya za ta kafa sabon kamfani a 2025 domin rage tsadar abinci da sauran kayayyaki
• Kamfanin zai yi hadin gwiwa da Bankin Masana'antu, BOI, da Hukumar Zuba Jarin Kasa, NSIA, domin tallafa wa matasa da mata
• Wani magidanci, Umar Bello ya bayyanawa Legit cewa za su yi farinciki idan gwamnati ta dauki matakin rage tsadar abinci a 2025

Editan Legit Hausa Ibrahim Yusuf yana da gogewar aikin jarida da rubuce-rubucen adabi sama da shekaru hudu, kuma kwararre ne a kawo rahotannin kasuwanci, siyasa da lamuran yau da kullum.

FCT, Abuja - Shugaban kasa, Bola Tinubu, ya bayyana aniyar gwamnatin tarayya na saukaka rayuwar al’ummar Najeriya a sabuwar shekara.

Bola Tinubu ya bayyana hakan ne a jawabin sabuwar shekarar da ya gabatar ga kasa, inda ya bayyana cewa sabon kamfani da za a kafa zai rage tsadar kayan abinci.

Kara karanta wannan

"Tinubu na da hali irin na Sardauna," Ganduje ya hango abin da zai faru a 2025

Jaridar Vanguard ta rahoto cewa shugaba Bola Tinubu ya bukaci hadin kan 'yan kasa wajen daura Najeriya a kan turba mai kyau.

Bola Tinubu zai kafa kamfanin rage tsada

Shugaba Bola Tinubu ya bayyana cewa sabon kamfani zai fara aiki kafin karshen zangon farko na shekarar 2025.

Kamfanin zai yi aiki tare da manyan hukumomi kamar Bankin Masana'antu (BOI), Hukumar Zuba Jarin Kasa (NSIA), da Ma’aikatar Kudi.

A cewar Tinubu, wannan matakin zai karfafa tsarin bashi, musamman ga matasa da mata, da kuma tallafa wa ci gaban tattalin arzikin kasa.

Shirin taron matasa na shekarar 2025

Shugaba Tinubu ya kuma bayyana cewa taron matasa da ya yi alkawari bayan zanga-zangar adawa da tsadar rayuwa zai fara a farkon watannin 2025.

Punch ta wallafa cewa Bola Tinubu ya ce gwamnati na kokarin rage hauhawar farashi daga kashi 34.6% zuwa kashi 15%, tare da bunkasa samar da abinci da magunguna a cikin gida.

Kara karanta wannan

2025: An gano yadda filin saukar jirgin Tinubu zai lakume N4bn ana kukan ba kudi

Tinubu ya bukaci hadin kan 'yan Najeriya

Shugaban kasa ya yi kira ga 'yan Najeriya da su yi watsi da bambance-bambancen siyasa, kabila, ko addini domin cimma burin tattalin arziki.

"Muna kan turbar gina Najeriya mai kyau ga kowa. Kada mu bari wani bangare na al’umma ya karkatar da mu daga wannan tafiyar.”

- Bola Tinubu

Shugaban ya kara da cewa gwamnati za ta kara karfafa dabi’u da kishin kasa a karkashin wani shiri na musamman a 2025.

Legit ta tattauna da Umar Bello

Wani magidanci mai 'ya'ya uku, Umar Bello ya ce abin farinciki ne a samu saukin abinci kuma hakan zai kara farin jini ga Bola Tinubu.

Sai dai Umar Bello ya nuna shakku kan cewa ba lallai a cika alkawarin ba lura da yadda 'yan siyasa suke gaza cika alkawura a baya.

Gwamnan Bauchi ya yi martani ga Tinubu

A wani rahoton, kun ji cewa gwamnan jihar Bauchi ya yi martani ga fadar shugaban kasa bayan zarginsa da yin barazana ga Bola Tinubu.

Kara karanta wannan

'An lalata Najeriya fiye da kima,' An tono wata tattaunawar Akpabio da Tinubu

Sanata Bala Mohammed ya ce maganar da ya yi a kan kudirin haraji ba barazana ba ce kawai yana gargadi ne kan abin da zai iya faruwa idan kudirin ya tabbata.

Muhammad Malumfashi, babban edita a sashen Hausa na Legit ya duba labarin.

Asali: Legit.ng