Matasa Sun Taso da Batun Kudin N Power, Sun Aika Muhimmin Sako ga Sabon Minista

• Masu cin gajiyar N-Power da har yanzu ba a biya su haƙƙinsu ba sun rubuta ƙorafi zuwa ga sabon ministan jin kai, Nentawe Yilwatda
• Matasan waɗanda suka yi aiki a rukunin C II daga watan Oktoba, 2022 zuwa Satumba, 2023 sun buƙaci minista ya duba lamarinsu
• Sun bayyana cewa duk aikin da aka ɗora masu sun kammala amma har yanzu gwamnati ba ta biya su kuɗinsu ba

Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum

Abuja - Matasa sun sake taso da batun biyan haƙkokin ƴan N-Power bayan sabon ministan harkokin jin ƙai da rage raɗaɗin talauci, Nentawe Yilwatda ya kama aiki.

Wasu daga cikin ƴan N-Power sun rubuta ƙorafi sun kai wa sabon ministan, suka roƙi a biyasu kuɗin aikin da suka yi daga watan Oktoba, 2022 zuwa Satumba, 2023.

Kara karanta wannan

'Yan ta'adda sun hallaka mutane 8 a wani harin ta'addanci

Ƴan N-Power sun aika sako ga minista

Hakan na kunshe ne a wata takarda mai dauke da sa hannun lauya mai fafutukar kare hakkin dan Adam, Deji Adeyanju, a madadin ƴan N-Power, Leadership ta rahoto.

Takardar na ɗauke da kwanan ranar 5 ga Nuwamba, 2024, da taken, “Bukatar biyan haƙƙin ma’aikatan N-Power daga Oktoba 2022 zuwa Satumba 2023."

Yadda kuɗin N-Power suka maƙale

Idan baku manta ba ma'aikatan N-Power sun biyo gwamnatin tarayya bashin alawus dinsu na wata-wata har na tsawon shekara.

A baya tsohuwar ministar jin ƙai, Betta Edu, ta fara kokarin biyan bashin amma daga baya aka dakatar da ita bisa zargin hannu a karkatar da wasu kuɗaɗe.

A ƙorafin da masu cin gajiyar shirin N-Power suka aikawa sabon ministan jin ƙai, sun yi bayanin cewa sun sauke duk nauyun da aka ɗora masu amma haƙkinsu ya maƙale.

Kara karanta wannan

'Yan bindiga sun yi garkuwa da babban limami a Najeriya

Ma'aikatan N-Power su bukaci a biya su haƙƙinsu

A takardar, lauyan ya ce:

"Matasan nan sun yi rijista kuma an ɗauke su aikin N-Power na wucin gadi, sannan aka tura su wurare daban-daban domin su yi aikin shekara guda daga Oktoba, 2022 zuwa Satumba, 2023.

"Duk da sun cika dukkan wajibai na aikin N-Power cikin amana ta hanyar ba da lokaci da ƙarfinsu, har yanzu ba a biya su hakkokinsu na wata-wata ba."

Ƴan N-Power sun nuna damuwa

A wani rahoton, an ji cewa matasa ƴan N-Power sun nuna damuwa da shirin gwamnatin tarayya na rusa ma'aikatar harkokin jin kai da yaƙi da fatara.

Shugaban N-Power na jihar Kano, Nazifi Mohammed Abubakar ya ce ma'aikatar ce kaɗai wata hukumar gwamnati mai alaka da talakawa.

Muhammad Malumfashi, babban edita a sashen Hausa na Legit ya duba labarin.

Asali: Legit.ng