Kotu Ta Ba da Umarni kan Hana ba Kananan Hukumomin Kano Kudi

• Babbar kotun jihar Kano ta ba da umarni kan yiwuwar hana ƙananan hukumomin Kano kuɗinsu daga asusun tarayya
• Kotun ta hana Akanta Janar na tarayya, bankin CBN da hukumar RMAFC hana ba ƙananan hukumomin Kano kuɗi duk wata
• Wasu mambobin ƙungiyar ma'aikatan ƙananan hukumomi (NULGE) suka shigar da ƙarar a gaban kotun kwanan nan

Editan Legit Hausa Sharif Lawal yana da ƙwarewar shekaru wajen kawo rahotannin siyasa, al'amuran yau da kullum, tsegumi da nishaɗi

Jihar Kano - Wata babbar kotun Kano ƙarƙashin jagorancin mai shari’a, Ibrahim Musa Muhammad, ta ba da umarni kan riƙe kuɗin ƙananan hukumomin jihar Kano.

Kotun ta bayar da umarnin hana hukumomin gwamnatin tarayya yin katsalanda ga kuɗin da ake ba ƙananan hukumomi 44 na jihar Kano duk wata.

Jaridar Leadership ta rahoto cewa hukuncin kotun ya biyo bayan ƙarar da mambobin ƙungiyar ma’aikatan ƙananan hukumomi ta ƙasa (NULGE) suka shigar a ranar 1 ga watan Nuwamba, 2024.

Kara karanta wannan

Fadan daba ya jawo sanadiyyar rasa rayukan mutane a Benue

Kano: Wane umarni kotun ta ba da?

A cikin umarnin kotun mai ɗauke da kwanan watan 4 ga watan Nuwamba, mai shari’a Ibrahim Musa ya ba masu shigar da ƙarar izinin miƙa takardun kotu a ofisoshin Akanta Janar na tarayya, bankin CBN da hukumar RMAFC.

Ƙarar da Bashir Yusif Muhammad Esq da Umar Bala Salisu Esq suka shigar, sun nuna damuwa kan yiwuwar riƙewa ko jinkirin ba da kuɗin ƙananan hukumomin a jihar.

Kotun ta bayar da umarnin wucin gadi na hana hukumomin gwamnatin tarayya daga ɗaukar matakan da za su iya kawo cikas ga biyan kuɗin da ake ba ƙananan hukumomin jihar Kano duk wata.

An ɗage sauraron ƙarar zuwa ranar 21 ga watan Nuwamba, 2024, lokacin da za a ci gaba da sauraronta.

Kotu ta hana ba Rivers kuɗi daga tarayya

A wani labarin kuma, kun ji cewa babbar kotun tarayya da ke Abuja ta yi hukunci kan ƙarar neman hana gwamnatin tarayya sakarwa gwamnatin jihar Rivers kuɗinta.

Kara karanta wannan

'Yan bindiga sun yi wa dan majalisa illa, sun hallaka surukarsa da dan uwan matarsa

Kotun a hukuncin da ta yanke ranar Laraba, 30 ga watan Oktoba ta hana gwamnatin tarayya daga ci gaba da sakarwa jihar Rivers kudi duk wata.

Muhammad Malumfashi, babban edita a sashen Hausa na Legit ya duba labari

Asali: Legit.ng