Zanga Zanga: Kananan Yaran da Aka Kama Sun Sume a Gaban Alkali, An Gano Dalili

• An shiga tashin hankali da wasu daga cikin ƙananan yaran da ake zargi suka suma a gaban alkalin babbar kotun tarayya mai zama a Abuja
• Yaran wadanda aka kama su a Kano lokacin zanga-zanga sun yanki jiki sun faɗi a lokacin da ƴan sanda suka gurfanar da su a kotu
• Lauyan waɗanda ake tuhuma ya ce wannan alama ce da ke nuna ba su samun abinci da kulawar da ta dace a hannun ƴan sanda

Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum

Abuja - Wasu daga cikin ƙanann yaran da ƴan sanda suka cafke lokacin zanga-zangar yunwa sun sume a gaban Alkalin babbar kotun tarayya mai zama a Abuja

Rahotanni sun nuna cewa lamarin ya afku ne a lokacin da ƴan sanda suka kawo waɗanda ake tuhumar gaban Mai Shari'a Obiora Egwuatu.

Kara karanta wannan

Pantami da mutane sun fusata da maka kananan yara a Kotu saboda zanga zanga

Tashar Channels tv ta ce yaran da jami'an tsaron suka kama su 75 ba su wuce shekara 12 zuwa 15 ba, kuma ana zarginsu da ta'addanci da yunkurin kifar da gwamnati da sunan zanga-zanga.

Yadda aka kama kananan yara a Kano

Jami'an tsaro sun kama su ne ranar 3 ga watan Agusta, 2024 kuma tun wannan lokaci su na tsare a hannun ƴan sanda.

Ana zargin dai su na daga cikin waɗanda suka shiga zanga-zangar yunwa, inda suka rika rera waƙoƙin adawa da gwamnati da ɗaga tutar Rasha a jihar Kano.

Ɗaya daga cikin lauyoyin waɗanda ake kara, Marshall Abubakar ya ce an gurfanar da yaran kashi biyu; kashi na farko su 76 da kashi na biyu su 49.

Kananan yaran da ake tuhuma sun suma a kotu

Bayan an kira na farko, sun taso da nufin zuwa wurin da aka warewa waɗanda ake tuhuma, kwatsam wasu daga cikinsu akalla yara biyar suka faɗi ƙasa sumammu.

Kara karanta wannan

Muguntar T pain: Atiku ya caccaki gwamnatin Tinubu kan kai yara kotu

Lamarin dai ya haifar da ruɗani da tashin hankali a kotun, wanda ya sa alkali ya sanar da ɗage zaman nan take.

Tuni dai aka kira malaman lafiya na asibitin kotun domin su duba waɗanda suka yanke jiki suka faɗi, kamar yadda The Nation ta kawo labarin.

Wane halin yaran su ke ciki?

Lauyan yaran, Marshall Abubakar ya ce abin da ya faru alama ce ta yunwa da rashin lafiya, inda ya ce kusan dukkannsu yara ne da ba su wuce shekara 12 ba.

"Yaran nan ba su da lafiya, ga yunwa. An ajiye su a hannun 'yan sanda na tsawon makonni ba tare da abinci da kulawar da ta dace ba. Ba su da lafiya kuma suna buƙatar kulawa," in ji shi.

An yi zanga-zangar tunawa da ENDSARS

A wani rahoton, kun ji cewa masu zanga-zanga sun mamaye Lekki Toll Gate da ke Legas domin tunawa da ranar da aka yi zanga-zangar EndSARS karo na hudu.

Kara karanta wannan

Zanga zanga: Amnesty ta bukaci Tinubu ya gaggauta sakin yaran da aka kai kotu

An ce sun yi taron ne domin sake nuna takaicin su kan zaluncin ‘yan sanda da kuma kashe matasan da aka yi shekaru hudu baya.

Muhammad Malumfashi, babban edita a sashen Hausa na Legit ya duba labarin.

Asali: Legit.ng