1 ga Oktoba: Zanga Zangar da Ake Shrin Yi Ta Gamu da Tangarɗa a Kaduna

• Zanga-zangar da ake shirin yi ranar 1 ga watan Oktoba ta gamu da cikas, wata ƙungiya ta roki ƴan Kaduna su canza tunani
• Mai magana da yawun ƙungiyar CCC reshen Kaduna, Yusuf Lawal ya ce zanga-zangar ba ta da amfani duba da abin da ya faru a baya
• Ya buƙaci mutanen Kaduna su ci gaba da harkokinsu na yau da kullum, su ƙauracewa fita zanga-zangar gobe Talata

Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum

Kaduna - Wata ƙungiyar matasa a Kaduna (CCC) ta yi kira ga al'ummar jihar su nesanta kansu daga shiga zanga-zangar tsadar rayuwa da ake shirin yi ranar 1 ga watan Oktoba, 2024.

A cewar ƙungiyar, zanga-zangar da aka yi a watan Agusta ba ta haifar da komai ba sai asarar rayuka da dukiyoyi a sassa daban-daban.

Kara karanta wannan

Rundunar ƴan sanda ta gargaɗi mutanen Kano kan zanga zangar da ake shirin yi

Mai magana da yawun ƙungiyar, Kwamared Yusuf Lawal ne ya bayyana haka yayin hira da manema labarai ranar Litinin a Kaduna, Daily Trust ta ruwaito.

Matasa sun faɗi mafita madadin zanga-zanga

Ya buƙaci matasan jihar Kaduna su nemi zama da gwamnati domin tattaunawa da lalubo mafita kan tsananin da ake ciki maimakon ɓarna da sunan zanga-zanga.

Yusuf Lawal ya ce duk da ba za a rasa inda gwamnati mai ci ta yi kuskure ba amma akawai bukatar a ba ta lokaci domin ta cika alƙawurran da ta ɗauka.

"Zanga-zangar da aka yi a baya-bayan nan musamman ta EndBadGovernance, ta jawo barna mai yawa da kuma asarar rayuka, ciki har da mutuwar wani matashi a Zariya."

"Kowa ya san halin da ake ciki na matsin tattalin arziki amma kamata ya yi 1 ga watan Oktoba ta zama ranar murna da girmama gudummuwar da mazan jiya suka bayar.

Kara karanta wannan

Zanga Zanga: Kungiyoyin Arewa sun amsa kiran fitowa tituna a ranar 1 ga Oktoba

"Rana ce ta tuna tarihi da haɗin kanmu a matsayin ƙasa guda, ba wai mu koma muna lalata kadarorin gwammati da na ƴan uwanmu da sunan zanga-zanga ba.

- In ji Kwamared Yusuf Lawal.

Matasan Kaduna sun ce babu amfanin zanga-zanga

Yusuf ya buƙaci mazauna Kaduna da su ci gaba da gudanar da harkokinsu na yau da kullun maimakon shiga zanga-zangar da za ta iya haifar da hargitsi da tashin hankali.

A cewarsa, zanga-zanga ta gaza warware kalubalen da al'umma ke ciki, inda ya ƙara da cewa tattaunawa da ba gwamnati haɗin kai ya fi zama mafita a halin yanzu, in ji Vanguard.

Akpabio ya ƙara ba ƴan Najeriya haƙuri

A wani rahoton kuma Sanata Godswill Akpabio ya ƙara bai wa ƴan Najeriya haƙuri kan halin da ake ciki na ƙunci da yunwa a faɗin ƙasar.

Shugaban majalisar dattawa ya tabbatar da cewa nan gaba kaɗan komai zai wuce kuma mutane za su shiga cikin haske da walwala.

Muhammad Malumfashi, babban edita a sashen Hausa na Legit ya duba labarin.

Asali: Legit.ng