Shugabannin Zanga Zanga Sun Samu Matsala Bayan DSS Ta Dauki Wani Mataki

• Wasu shugabannin da suka jagoranci zanga-zangar nuna adawa da halin ƙunci da rashin tsaro a jihar Katsina sun faɗa hannun hukumar DSS
• Hukumar DSS ta gayyaci shugabannin ne zuwa ofishinta domin amsa tambayoyi inda daga bisani suka tsare su
• Hakan ya biyo bayan fara zanga-zangar da aka yi a ranar Alhamis, 1 ga watan Agustan 2024 a faɗin ƙasar nan kan taɓarɓarewar al'amura

Editan Legit Hausa Sharif Lawal yana da ƙwarewar shekaru wajen kawo rahotannin siyasa, al'amuran yau da kullum, tsegumi da nishaɗi

Jihar Katsina - Hukumar tsaro ta farin kaya (DSS) ta cafke jagororin zanga-zangar nuna adawa da halin matsin tattalin arziƙi da rashin tsaro da aka gudanar a jihar Katsina.

Kabir Shehu Yandaki da Habibu Ruma, shugabannin zanga-zangar "Struggle for Good Governance" an gayyace su zuwa ofishin DSS da ke Katsina, inda daga bisani aka tsare su.

Kara karanta wannan

Masu zanga zanga sun dira gidan Buhari a Daura, bayanai sun fito daga Katsina

DSS ta cafke jagororin zanga-zanga

Hakazalika, Mujittapha Usman, wanda ya jagoranci zanga-zangar a ƙaramar hukumar Malumfashi, shi ma jami’an tsaro sun kama shi, cewar rahoton jaridar Vanguard.

Wasu abokan shugabannin da suka bayyana hakan sun ce hukumar DSS ta tuntuɓi mutanen ne ta wayar tarho da sanyin safiya, rahoton Katsina Times ya tabbatar.

Sun buƙaci su bayyana a ofishinsu domin amsa tambayoyi game da zanga-zangar da aka yi a ranar Alhamis.

Sai dai majiyar ta bayyana cewa da isar su hedkwatar DSS ta Katsina, an tsare su kuma har yanzu ba a sake su ba har zuwa wannan lokacin.

Zanga-zanga ta rikiɗe a Katsina

Zanga-zangar wacce aka fara cikin lumana ta riƙiɗe zuwa wani abu daban ne lokacin da wasu gungun mutane da suka haɗa da ƙananan yara, suka taru a titunan birnin Katsina ɗauke da sanduna da ganyayyaki.

Kara karanta wannan

Zanga zanga: Hankula sun tashi bayan jami'in tsaro ya harbi kansa

Sun yi ta faɗin “Bama yi Bama yi” yayin da suke ƙoƙarin lalata kayayyakin jama’a.

Da farko dai masu zanga-zangar sun ƙona wata motar sintiri ta NSCDC a babban birnin jihar tare da ƙona ofishin jam’iyyar APC na ƙaramar hukumar Dutsinma.

Hakan ya sanya gwamnatin jihar ta sanya dokar hana fita ta tsawon awa 24 a birnin Katsina da ƙaramar hukumar Dutsinma.

Masu zanga-zanga a gidan Buhari

A wani labarin kuma, kun ji cewa wasu fusatattun masu zanga-zanga sun yi dafifi zuwa gidan tsohon shugaban ƙasa Muhammadu Buhari da ke mahaifarsa ta Daura a jihar Katsina.

Masu zanga-zangar waɗanda suke da yawa, sun shiga zanga-zangar #EndBadGovernance da aka fara a faɗin ƙasar nan ranar Alhamis, 1 ga watan Agustan 2024.

Asali: Legit.ng