Zanga Zanga: Yan Daba sun Tare Jama'a, An Raunata 'Yan Jarida a Kano

• Yayin da zanga-zangar lumana ta rikide zuwa ta tashin hankali a Kano, 'yan jarida biyu sun shiga jerin wadanda aka illata
• Ibrahim Ayuba Isa, dan jarida da wata gidan talabijin a kasar nan ya ji rauni a lokacin da 'yan daba su ka tare motar 'yan jarida
• Ahmad Mahmud, shi ma dan jarida ne da gidan rediyo ya bayyanawa Legit yadda wasu masu zanga zanga su ka bi ta kansa

A'isha Ahmad edita ce a sashen Hausa na Legit. Tana da ƙwarewa wajen rubutun labarai da rahotanni tsawon shekaru uku. Ta kware a kawo rahotannin, al'amuran da su ka shafi mata da yara da siyasa.

Jihar Kano - 'Yan jarida a Kano sun shiga barazana yayin da wasu 'yan daba da su ka shiga rigar zanga-zanga su ka fara tare mutane.

Kara karanta wannan

Sanusi II ya yi magana kan zanga zanga, ya fadi hassadar da ake yi wa jihar Kano

Ibrahim Ayuba Isa, wanda ya ke dan jarida ne a Kano da ke daukar rahoto kan zanga zanga ga gidan talabijin TVC ya shaidawa Legit cewa da kyar ya tsira.

Yadda aka tare motar 'yan jarida a Kano

Ibrahim Ayuba Isa ya ce 'yan jarida sun cika mota guda domin daukar labarai a wannan rana, sai 'yan daba su ka tare su a hanyar Sokoto da ke karamar hukumar Nassarawa inda su ka nemi na goro.

Ya ce gabanin su mika masu wani abu, sai daya daga cikin 'yan daban ya buga gora ya fasa gilashin motar har ya ji masa ciwo a wuya da hannu.

Masu zanga zanga sun tare dan jarida

Ahmad Mahmud, dan jarida a gidan rediyon Premier ya shaida mana cewa ya na cikin tafiya a kokarinsa na zuwa wajen aiki ne wasu masu zanga-zanga su ka yi kansa.

Kara karanta wannan

Awanni kafin fita tituna, APC a Kano ta roki matasa alfarma kan lamarin zanga zanga

Ahmad Mahmud ya ce daya daga cikin masu zanga-zangar da ke cikin adaidata sahu ne ya yi kokarin bi ta kansa yayin da jami'an tsaro su ka koro su, inda ya ji raunuka.

Miyagu: 'Yan sanda sun fadi shirin zanga-zanga

A wani labarin kun ji cewa rundunar 'yan sandan Najeriya ta bankado shirin miyagu na yin amfani da lokacin zanga-zanga wajen tayar da hargitsi a fadin kasar nan.

Babban sufeton 'yan sanda na kasa, Olukayode Ogbetokun ya ce sun dade da samun bayanan sirrin shirin miyagun, shi yasa su ka nemi bayanan masu yin zanga-zangar.

Muhammad Malumfashi, babban edita a sashen Hausa na Legit ya duba labarin.

Asali: Legit.ng