EFCC Ta Bankado Makarkashiyar da Ake Kulla Mata, Hukumar Ta Aika da Gargadi

• Hukumar EFCC wacce ke yaƙi da masu aikata rashin gaskiya a Najeriya ta ce akwai masu shirin yin zanga-zanga kan ayyukanta
• EFCC ta bayyana cewa wasu gurɓatattu ne da hukumar ke bincika ko tuhuma ke son yin amfani da zanga-zangar domin kawo rikici a ƙasa
• Ta bayyana cewa ko kaɗan ba za ta bari a yiwa doka karan tsaye ba musamman a ofisoshinta da ke faɗin Najeriya

Editan Legit Hausa Sharif Lawal yana da ƙwarewar shekaru wajen kawo rahotannin siyasa, al'amuran yau da kullum, tsegumi da nishaɗi

FCT, Abuja - Hukumar yaƙi da masu yiwa tattalin arziƙin ƙasa zagon ƙasa (EFCC), ta sanar da jama'a maƙarƙashiyar da ake ƙulla mata.

Hukumar EFCC ta bayyana cewa akwai wani shiri da wasu ƙungiyoyi ke yi domin tayar da zanga-zangar nuna adawa da hukumar.

Kara karanta wannan

Shugaban EFCC ya koka kan girman satar da ake yi, ya fadi abin da 'yan Najeriya za su yi

Hukumar ta bayyana hakan ne a cikin wata sanarwa da mai magana da yawunta, Dele Oyewale, ya sanya a shafin X na hukumar.

Wane shiri ake yiwa hukumar EFCC?

EFCC ta ce a cikin ƴan kwanakin da suka gabata, ƙungiyoyin sun yi kamfen sosai a shafukan sada zumunta, inda suka ɗauki haziƙan matasan Najeriya, ciki har da ɗalibai domin nuna adawa da ayyukanta.

Ta ce ana ci gaba da gudanar da wannan kamfen ɗin ne domin nuna turjiya kan ayyukan hukumar musamman ta fuskar aiwatar da dokokin da suka shafi aikata laifukan yanar gizo.

Jawabin da hukumar EFCC ta fitar

"Hukumar, duk da cewa ba ta nuna adawa da zanga-zangar da ƴan ƙasa ke da ikon yi ba, ta damu bisa shaidun da ke nuna wani shiri na wasu gurɓatattu da hukumar ke bincika ko tuhuma domin yin amfani da zanga-zangar su tayar da hargitsi a ƙasa."

Kara karanta wannan

Hankula sun tashi bayan jami'in hukumar EFCC ya salwantar da ransa

"A matsayin hukumar tabbatar da doka da oda, hukumar ba za ta amince da duk wani shirin yiwa doka karan tsaye ba a ko’ina a cikin ƙasar nan musamman a kusa da ofisoshinta a faɗin Najeriya."

"EFCC, tare da sauran hukumomin ​​tsaro na aiki domin ɗaukar matakan da suka dace wajen magance matsalolin da ke barazana ga zaman lafiya da tsaron Najeriya."

- Dele Oyewale

Shugaban EFCC ya koka kan sata a Najeriya

A wani labarin kuma, kun ji cewa shugaban hukumar yaƙi da yiwa tattalin arziƙin ƙasa zagon ƙasa, Ola Olukoyede, ya koka kan girman satar da wasu masu cin hanci da rashawa ke yi a ƙasar nan.

Ya ce ya kan kasance a cikin mamaki kan yadda har yanzu ƙasar nan ba ta durƙushe ba duk lokacin da ya duba takardun shari'a ya ga irin kuɗaɗen da aka sata.

Muhammad Malumfashi, babban edita a sashen Hausa na Legit ya duba labarin.

Asali: Legit.ng