"Za Mu Bi Tsarinmu," Gwamna Ya Faɗi Shirinsa Kan Sabon Mafi Ƙarancin Albashi

• Gwamna Umar Namadi na jihar Jigawa ya ce har yanzu gwamnatin jihar ba ta yanke adadin da zata biya a mataayin sabon mafi karancin albashi ba
• Namadi ya bayyana cewa gwamnatin Jigawa ba ta ma fara tattaunawa kan ƙarin albashi da ƙungiyar kwadago ta jihar ba
• Ya ce zai sanar da sabon mafi ƙarancin albashin da gwamnatinsa za ta yi amfani da shi bayan zama da ƴan kwadago

Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum

Dutse, jihar Jigawa - Gwamna Umar Namadi na jihar Jigawa ya bayyana shirinsa kan sabon mafi ƙarancin albashin ma'aikata a jihar.

Namadi ya ce bai dame shi ko nawa gwamnatin tarayya ta yanke a matsayin mafi ƙarancin albashi ba amma gwamnatinsa za ta tattauna da ma'aikata kan lamarin.

Kara karanta wannan

"Talauci zai ƙaru a Najeriya": NLC ta gargaɗi gwamnoni kan yanke mafi ƙarancin albashi

Gwamnan ya bayyana haka ne yayin da yake jawabi a cikin shirin Sunrise Daily na gidan talabijin na Channels ranar Jumu'a, 28 ga watan Yuni, 2028.

Idan baku manta ba gwamnatin tarayya karkashin Bola Ahmed Tinubu ta miƙa tayin N62,000 ga ƴan kwadago a lokacin tattaunawa kan ƙarin albashin.

Amma da yake tsokaci kan lamarin, Gwamna Namadi ya ce a al'adar jihar Jigawa wajibi ne masu ruwa da tsaki da ƴan kwadago su zauna su yanke adadin da za a biya.

Gwamna Namadi ya faɗi shirinsa a Jigawa

Ya ce Jigawa ba ta amince da wani adadi a matsayin sabon mafi karancin albashi ba saboda ba su fara tattaunawa da ma’aikata a jihar ba har kawo yanzu.

"Ba zamu ce ga abin da zamu biya ba a yanzu saboda lamari ne na tattaunawa, Jigawa ba ta amince da wani adadi ba, a taƙaice ma bamu fara zaman ba.

Kara karanta wannan

NLC: Bola Tinubu ya samu saƙon mafita kan mafi ƙarancin albashi a Najeriya

"Zamu haɗa kwamiti da ya ƙunshi masu ruwa da tsaki da ƴan kwadago kuma mu yi aiki tare wanda a ƙarshen zamu cimma matsaya kan adadin da ya dace."

- Gwamnan Jigawa, Umar Namadi Ɗanmodi.

Gwamnoni sun gana kan karin albashi

A wani rahoton na daban Gwamnoni 36 na Najeriya sun tabbatar da cewa ma'aikata za su samu ƙarin albashi mai tsoka a tattaunawar da ake yi

AbdulRahman AbdulRazaq na jihar Kwara ne ya bayyana haka bayan taron ƙungiyar gwamnoni wanda ya gudana ranar Laraba.

Asali: Legit.ng