Lokaci Ya Yi: Kwamishinan Bauchi Ya Rasu Yana da Shekara 60 a Duniya

• Allah ya yiwa kwamishinan ƙananan hukumomi da masarautu na jihar Bauchi rasuwa a ranar Asabar, 1 ga watan Yunin 2024
• Ahmed Jalam ya rasu ne tare da direbansa a wani hatsarin mota da ya ritsa da su lokacin da yake kan hanyar zuwa garinsa na Jalam
• Gwamnan jihar Bauchi, Sanata Bala Mohammed, ya aike da saƙon ta'aziyyarsa inda ya bayyana rasuwar kwamishinan a matsayin babban rashi

Editan Legit Hausa Sharif Lawal yana da ƙwarewar shekaru wajen kawo rahotannin siyasa, al'amuran yau da kullum, tsegumi da nishaɗi

Jihar Bauchi - Kwamishinan ƙananan hukumomi da masarautu na jihar Bauchi, Ahmed Jalam ya rasu.

Marigayin ya rasu ne tare da direbansa a wani hatsarin mota da ya rutsa da su a hanyar babban titin Bauchi/Jalam a ranar Asabar, 1 ga watan Yunin 2024.

Kara karanta wannan

Hantar Tinubu ta ƙaɗa, Shugaban PDP ya faɗi yadda za a kayar da APC a zaɓen 2027

An bayyana cewa suna kan hanyarsu ta zuwa garin Jalam ne a ƙaramar hukumar Dambam a lokacin da hatsarin ya auku, cewar rahoton jaridar The Punch.

Gwamnan Bauchi ya yi ta'aziyya

Da yake miƙa saƙon ta'aziyyarsa, gwamnan jihar Bauchi, Sanata Bala Mohammed, ya bayyana rasuwar Ahmed Jalam a matsayin wani babban rashi.

Gwamnan ya bayyana cewa rasuwarsa ta bar giɓi saboda jajircewarsa wajen yiwa al'umma hidima, rahoton jaridar Daily Trust ya tabbatar.

“Mutuwar kwamishinan ta bar babban giɓi a jihar kuma ta jefa mutanen jihar cikin alhini saboda yadda ya yi suna wajen sadaukar da kai da jajircewarsa wajen yin hidima."

"Ahmad Jalam ya riƙe muƙamin kwamishinan harkokin addini a shekarar 2019 kuma an sake naɗa shi matsayin kwamishina a shekarar 2023 kuma ya yi aiki a ma'aikatar ƙananan hukumomi da masarautu har zuwa ƙarshen rasuwarsa."

Kara karanta wannan

Matawalle ya dauki zafi kan kisan sojoji a Abia, ya fadi matakin dauka

- Sanata Bala Mohammed

Kwamishinan ya rasu yana da shekaru 60 a duniya kuma ya bar mata da ƴaƴa.

Za a yi sallar jana’izarsa a safiyar ranar Lahadi, 2 ga watan Yuni kamar yadda addinin Musulunci ya tanada a garinsu na Jalam.

Wani Alhaji ya rasu a Saudiyya

A wani labarin kuma, kun ji cewa ɗaya daga cikin alhazan jihar Legas mai suna, Idris Oloshogbo, ɗan kimanin shekaru 68 a duniya ya rasu a ƙasa mai tsarki.

Likitocin ƙasar Saudiyya ne suka tabbatar da rasuwar Alhaji Oloshogbo a birnin Makkah bayan ya dawo daga Ɗawafin Ka'abah.

Asali: Legit.ng