Tashin Hankali Yayin da Bam Ya Halaka Bayin Allah a Arewa, Bayanai Sun Fito

• An samu asarar rayuka bayan wani tashin bam da ya auku a ƙaramar hukumar Gubio ta jihar Borno
• Shugaban ƙaramar hukumar Gubio wanda ya tabbatar da aukuwar lamarin ya ce mutum shida ne suka rasa ransu a sakamakon tashin bam ɗin
• An yi nuni da cewa wasu ƴan jari-bola ne cikin rashin sani suka adana bam ɗin cikin kayayyakin ƙarafansu ba tare da sanin cewa bam ba ne

Editan Legit Hausa Sharif Lawal yana da ƙwarewar shekaru wajen kawo rahotannin siyasa, al'amuran yau da kullum, tsegumi da nishaɗi

Jihar Borno - Wani bam da ya tashi ya kashe Almajirai huɗu da manyan mutane mutum biyu a ƙaramar hukumar Gubio dake jihar Borno.

Jaridar Daily Trust ta ce da yake tabbatar da faruwar lamarin, shugaban ƙaramar hukumar Gubio, Alhaji Mali Gubio, ya ce lamarin ya faru ne a wani ginin da ba a kammala ba da misalin ƙarfe 11:00 na safe, a ranar Asabar.

Kara karanta wannan

Gwamnan Arewa ya bayyana abu 1 da ya hana kawo karshen matsalar tsaro a jiharsa

A kalamansa:

"Duk mutanen da abin ya shafa sun mutu don haka ba za mu iya sanin ainihin abin da ya faru ba, amma fashewar bam ne a wani gida da aka ajiye ƙarafa.

“An gano gawarwakin Almajirai huɗu da manya mutane mutum biyu, amma ba mu iya tantance gawarwakin manyan mutanen biyu ba da aka gano gawarsu a wurin ba, kuma babu wanda ya zo ɗaukarsu."

Ya ce gwamnan jihar, Babagana Umara Zulum, ya hana jari-bola a jihar domin hana ɓarnatar da kayayyakin gwamnati a yankunan da ba kowa.

Ya ce mutane da yawa sun yi imanin cewa, ba da saninsu ba ne masu jari-bolan suka tattara tare da adana bam ɗin tare da wasu ƙarafa a ginin da ke kusa da makarantar Alqur’anin (Tsangaya), cewar rahoton jaridar Vanguard.

Zulum Ya Faɗi Ɓarnar da Ƴan Ta'adda Suka Yi a Borno

Kara karanta wannan

Gwamnan PDP ya aike da muhimmin sako ga Wike da Tinubu bayan nasara a Kotun Koli

A wani labarin kuma, kun ji cewa Gwamnan jihar Borno, Farfesa Babagana Umaru Zulum, ya bayyana cewa ƴan ta'addan Boko Haram sun lalata sama da kashi 90 cikin 100 na gidaje a jihar.

Gwamna Zulum ya ce babban abin farin cikin shi ne gwamnan da ya gabace shi da kuma shi kansa sun sake gina sama da kaso 30-40 na gidajen da ƴan ta'addan suka lalata a shekara 12 da suka wuce.

Asali: Legit.ng