Tinubu Ya Sallami Shugabannin NBC, NAN Da NTA, Ya Nada Sabbi

• Shugaba Bola Tinubu ya yi sabbin nade-nade a Ma’aikatar Yada Labarai da Hukumar Wayar da Kan Jama’a
• Tinubu ya yi sabbin nade-naden ne har guda takwas wadanda za su yi aiki karkashin ma’aikatar Yada Labarai
• Hadimin shugaban a bangaren kafar sadarwa ta zamani, David Olusegun shi ya bayyana haka a yau Alhamis ashafin Twitter

FCT, Abuja – Shugaban kasa, Bola Ahmed Tinubu ya yi sabbin nade-nade a Ma’aikatar Yada Labarai da Hukumar Wayar da Kan Jama’a (NOA).

Tinubu ya nada Mista Lanre Issa Onilu a matsayin shugaban Hukumar ta NOA yayin da ya nada Salihu Abdulhamid Dembos shugaban Gidan Talabijin na Kasa, NTA.

Su waye Tinubu ya nada a hukumomin?

Hadimin shugaban a bangaren kafar sadarwa ta zamani, David Olusegun shi ya tabbatar da haka a shafinsa a Twitter a yau Alhamis 19 ga watan Oktoba.

Kara karanta wannan

Da Dumi-Dumi: Majalisar Dattawa Ta Bi Umarnin Tinubu, Ta Tabbatar a Nadin Manyan Mukaman da Ya Tura

Tinubu ya nada mutane takwas a hukumomin wanda za su yi aiki karkashin ma’akatar Yada Labarai.

Sanarwar ta ce:

"Shugaba Tinubu ya nada sabbin shugabanni a ma'aikatar yada labarai ta kasa."

Legit Hausa ta jero muku jerin sabbin nade-naden:

1. Mista Lanre Issa Onilu - shugaban hukumar NOA

2. Mista Salihu Abdulhamid Dembos - shugaban NTA

3. Dakta Mohammed Bulama - shugaban hukumar FRCN

4. Mista Charles Ebuebu - shugaban hukumar NBC

5. Jibrin Baba Ndace - shugaban hukumar VON

6. Dakta Lekan Fadolapo - shugaban hukumar ARCON

7. Ali Mohammed Ali - shugaban hukumar NAN

8. Mista Dili Ezughan - shugaban hukumar NPC."

Wane gargadi Tinubu ya yi ga sabbin nade-naden?

Tinubu ya bukaci sabbin shugabannin da su yi aiki don kawo sauyi a hukumominsu daban-daban, Legit ta tattaro.

Tinubu ya kuma bukace su da su yi iya yinsu don ganin sun hada kan 'yan kasar da sauya tunanin mutane da kuma daga martabar kasar a idon duniya.

Kara karanta wannan

Ruwan Nadin Mukaman Tinubu Ya Shiga SON, An Nada Sabon Shugaba a Najeriya

Wannan na zuwa ne bayan shugaba Tinubu ya nada sabon shugaban hukumar ICPC, Dakta Adamu Aliyu Musa a ranar Talata 17 ga watan Oktoba.

Majalisa ta tabbatar da nadin shugaban EFCC, NSIPA

A wani labarin, majalisar Dattawa ta tabbatar da nadin shugaban hukumar EFCC da NSIPA a jiya Laraba.

Majalisar ta amince da nadin Ola Olukoyede da Halima Shehu a matsayin shugabannin hukumomin.

Har ila yau, majalisar ta kuma tabbatar da mukamin sakataren Hukumar EFCC, Mohammed Hammajoda.

Asali: Legit.ng