'Yan Bindiga Sun Sace Babban Boka Da Halaka Hadimansa a Jihar Anambra
- Ƴan bindiga sun bi cikin tsakar dare sun sace wani babban boka da ake ji da shi a jihar Anambra dake Kudu maso Gabashin Najeriya
- Ƴan bindigan sun sace bokan ne wanda ake yi wa laƙabi da "Aƙwa Okuko Tiwaraki" a cikin otel ɗinsa
- Kafin tasa ƙeyar bokan wanda yake bayar da maganin bindiga, sai da ƴan bindigan suka halaka jami'an tsaronsa mutum biyu
Jihar Anambra - Ƴan bindiga sun sace wani babban boka a Oba cikin ƙaramar hukunar Idemili ta Arewa a jihar Anambra.
Bokan wanda ake yi wa laƙabi da “Akwa Okuko Tiwaraki” an sace shi ne ranar Lahadi da daddare a ɗakinsa na otel yayin da aka halaka wasu hadimansa guda biyu.
Asali: UGC
Jaridar The Nation ta tattaro cewa bokan wanda yana daga cikin manyan bokaye masu arziƙi da ake ji da su a jihar, ƴan bindigan sun sace shi ne cikin ruwan sanyi.
Wani majiya na kusa da iyalan bokan ya bayyana cewa an sace bokan ne a cikin otel ɗinsa, rahoton Vanguard ya tabbatar.
Shin kana da labarin da ka/ki ke son an wallafa ma ka/ki? Ka tuntubemu a info@corp.legit.ng!
A kalamansa:
"An sace Akwa Okuko Tiwaraki na Oba jiya da daddare a otel ɗinsa na 'Triple P Hotel."
"An halaka biyu daga cikin jami'an tsaronsa. Ina Nwa Ocha da Odeshi? Wannan fa shi ne mutumin da mutane su ke tururuwa a gidansa na Oba domin samun maganin bindiga da sihirin yin kuɗi."
Rundunar ƴan sanda ta tabbatar da aukuwar lamarin
Kakakin rundunar ƴan sandan jihar, Tochukwu Ikenga, ya tabbatar da aukuwar lamarin inda ya bayyana cewa kwamishinan ƴan sandan jihar, CP Aderemi Adeoye, ya bayar da umarnin farauto waɗanda suka sace shi.
"Lamarin ya auku ne jiya da daddare da misalin ƙarfe 11:30 na dare. CP Aderemi Adeoye ya bayar da umarni ga jami'an tsaro da su bi bayan ƴan bindigan da suka sace shi domin tabbatar da an sako shi." A cewarsa.
'Yan Bindiga Sun Kai Farmaki Gidan Tsohon Minista
A wani labarin kuma, ƴan bindiga sun kai hari gidan tsohon ministan watsa labarai, Labaran Maku a jihar Nasarawa.
Ƴan bindigan sun raunata masu gadi mutum biyu a farmakin da suka kai gidan tsohon ministan da daddare.
Asali: Legit.ng
