Mutuwa Rigar Kowa: Mahaifiyar Tsohon Minista a Najeriya Ta Mutu

• Mahaifiyar tsohon ministan sufurin jiragen sama, Osita Chidoka, ta mutu tana da shekaru 75 a duniya ranar Litinin
• A wata sanarwa mai ɗauke da sannun tsohon ministan, ya ce mahaifiyarsu ta mutu cikin salama zagaye da iyalanta a gidanta da ke Legas
• Ya bayyana cewa nan ba da jimawa ba iyalai zasu sanar da shirye-shiryen binne marigayya Mama Osi

Lagos - Deaconess Victoria Nneka Chidoka, Mahaifiyar tsohon ministan sufurin jiragen sama a Najeriya, Osita Chidoka, ta riga mu gidan gaskiya tana da shekaru 75 a duniya.

Shugabar iyalan gidan Chidoka ta mutu ne ranar Litinin 3 ga watan Afrilu, 2023 a gidanta da ke Ikeja, babban birnin jihar Legas bayan fama da rashin lafiya, kamar yadda Leadership ta rahoto.

Tsohon ministan ne ya tabbatar da mutuwar mahaifiyarsa a wata sanarwa mai taken, 'Sanarwan rasuwar Deaconess Victoria Nneka Chidoka,' ɗauke da sa hannunsa.

Kara karanta wannan

Rai Baƙon Duniya: Tsohon Kakakin Rundunar Sojin Saman Najeriya Ya Yanke Jiki Ya Faɗi, Ya Rasu a Abuja

A rahoton PM News, Sanarwan ta ce:

"Cikin ƙunci da raɗaɗin zuciya da cikakken imanin miƙa lamari ga Allah, muna sanar da rasuwar mahaifiyarmu, 'yar uwa kuma kakarmu, Deaconess Victoria Nneka Chidoka."

"Ta rasu tana da shekaru 75 a duniya ranar Litinin 3 ga watan Afrilu, 2023. Mama Osi kamar yadda aka saba kiranta ta cika cikin kwanciyar hankali kuma zagaye da iyalanta."

"Rai ya yi halinsa yayin da iyalai, yan uwa da abokan arziƙi da masoya suka kewaye ta, wanda ya kawo karshen kalubalen rashin lafiya da ta sha fama da su a karshen rayuwarta."

Chidoka a madadin iyalan gidansu ya ƙara da cewa, "A wannan lokacin muna roƙa mata soyayyar Allah, rahama da salama da sauran iyalan da ta bari a baya."

"Nan ba da jimawa ba iyalanta zasu sanar da shirye-shirye binne ta a lokacin da ya dace."

Kara karanta wannan

Babbar Magana: 'Yan Sanda Sun Mamaye Babbar Sakatariyar Jam'iyya, Sun Kwace Iko Da Ita

Daga cikin 'ya'yan da ta mutu ta bari har da ɗan majalisar wakilan tarayya, Honorabul Obinna Chidoka, mai wakiltar mazaɓar Idemili ta arewa/Kudu a jihar Anambra.

Uwar gidan Sanata Orji Kalu ya rasu

A wani labarin kuma Tsohon gwamnan jihar Abiya, Sanata Orji Uzo Kalu, ya yi babban rashi a cikin iyalansa

Uwar gidan Sanatan, Misis Ifeoma Kalu.ta kwanta dama tana da shekaru 61 a duniya.

Asali: Legit.ng