Wasu Tsagerun ’Yan Bindiga Sun Hallaka Mutane Har 3 a Jihar Adamawa
- Rundunar ‘yan sandan jihar Adamawa ta tabbatar da mutuwar wasu mutane uku a wani yankin karamar hukumar Hong
- Wannan lamari na zuwa ne a wani kazamin harin da ‘yan bindiga suka kai da daren jiya Lahadi 2 ga watan Afrilu
- A bangare guda, wasu ‘yan bindiga sun kutsa har cikin gida sun sace wasu daliban jami’a, sun tafi dasu cikin daji
Jihar Adamawa - An tabbatar da kisan mutane uku a wani kazamin harin da ‘yan bindiga suka kai Dabna da ke yankin Dugwaba a karamar hukumar Hong ta jihar Adamawa.
Rundunar ‘yan sandan jihar ce ta tabbatar da hakan a cikin wata sanarwar da ta ba manema labarai a ranar Litinin a Yola, rahoton Leadership.
A cewar rundunar, yanzu haka an tura jami’ai da kayan aikin da suka dace domin tabbatar da kamo wadanda suka aikata laifin.
Asali: UGC
Kwamishinan ‘yan sanda ya yi Allah-wadai da harin
Hakazalika, sanarwar ta ce, kwamishinan ‘yan sandan jihar, Afolabi Babatola ya yi Allah-wadai da harin, The Street Journal ta ruwaito.
DUBA: Shigo shafin Legit.ng na manhajar Legit.ng na Telegram! Kada ka bari komai ya wuce ka
Sanarwar ta ce:
“Wasu ‘yan bindigan da ba a san ko su waye ba sun kai kari a daren Lahadi, inda suka farmaki al’umma na bacci suka yi harbin kan mai uwa da wabi kan jama’a.
“Biyo bayan harin, kwamishinan ‘yan sanda ya umarci a gaggauta kamo wadanda suka aikata laifin tare da binciken lamarin don tabbatar da zaman lafiya da adalci.”
Daga karshe, kwamishinan ya yi kira ga a zauna lafiya, a yi hakuri tare da ba jami’an tsaro hadin kai wajen tabbatar da tsaro da zaman lafiya a jihar.
Yadda aka sace ‘yan mata daliban jami’a a jihar Zamfara
A wani labarin, kunji yadda wasu tsagerun ‘yan ta’adda suka kai farmaki dakin kwanan dalibai na jami’ar tarayya da ke Gusau a jihar Zamfara da ke Arewa maso Yammacin Najeriya.
Harin ya zo da mummunan lamari, inda aka sace wasu dalibai mata biyu; Zainab da Maryam, an tafi dasu cikin dajin da har yanzu ba a san inda suke ba.
Ya zuwa yanzu, ‘yan sanda na ci gaba da bincike don gano inda aka tafi da daliban tare da kokarin tabbatar an ceto su ba tare da wata illa ba.
Asali: Legit.ng
