Manyan gobe: Hazikan matasa 'yan Najeriya 3 da suka kera motocin a zo a gani da kansu
Wasu matasan 'yan Najeriya sun nuna wa duniya cewa ana iya damawa da su a kowani yanayi, kuma a shirye suke su shiga a fafata da su a duniyar kera motoci.
Duk da tarin kalubale da suka fuskanta ta fuskacin kudi, kayan aiki da tallafi daga hukumomi, matasan sun kera motocin da ya ja hankalin mutane da yawa.
A wannan zaure, Legit.ng za ta waiwayi wasu matasan yan Najeriya uku da suka nunawa duniya hazikancinsu a bangaren kere-kere.
1. Jerry Isaac Mallo
Matashin ya ja hankali a kafofin watsa labarai sosai a shekarar 2019 lokacin da ya kera wata motar gudu daga kayayyakin da aka yi su da sinadarin 'carbon'. A cewarsa, sai da ya siyar da wayarsa lokacin da yake bukatar kudi.
A yayin gwada motar a 2019, mutane da dama sun kewaye shi. An yi gagarumin bikin kaddamar da motar ne domin abun ya birge mutane sosai.
2. Dalibin ajin karshe na FUTMINNA
Wani bidiyo ya shahara game da wani dalibin jami'ar tarayya ta Minna (FUTMINNA) wanda ya kera wata mota mai kama da Escalade a zaman aikin kammala karatunsa.
Asali: Instagram
A dan gajeren bidiyon, an gano dalibin tare da abokansa suna tura motar a cikin makarantar yayin da mutane suka cika da al'ajabi.
3. Ibitoye Olajide Micheal
A yan kwanaki da suka gabata, Ojajide ya sanya mutane tofa albarkacin bakunansu lokacin da ya bayyana cewa sai da ya shafe tsawon shekaru hudu don kawai ya kera wata motar gudu.
Matashin ya kara da cewa saboda rashin mataimaki, ya dauki nauyin aikin ne daga dan kudade da yake tarawa na alawus dinsa na hidimar kasa.
Abokai uku sun kera mota mai tafiya a kan ruwa ta hanyar amfani da kayan gida, bidiyon ya birge mutane da yawa
A wani labarin, mun kawo a baya cewa abokai uku sun baje kolin motocin da suka kera mai ban mamaki.
Mutanen da ba a san ko su wanene ba, a cewar TRT World sun kirkiri motocin da ke tafiya a kan ruwa da kansu.
Legit.ng ta tattaro cewa motar anyi ta ne ta hanyar amfani da kayan gida.
Asali: Legit.ng
