Wani Matashi Ya Yi Kaca Kaca da Darasin Lissafi, Ya Kafa Tarihi a Jami'ar Arewa

• Wani matashi da ya karanci darasin lissafi a Jami'ar Ilorin da ke Kwara ya samu sakamako mai daraja ta ɗaya da lambar yabo
• Ɗalibin ya wallafa sakamakon da ya samu a soshiyal midiya bayan ya kammala karatun digirin farko a wannan makaranta
• Ya kammala karatu da jimullar maki 4.97 ma'ana dai ya samu sakamako mai daraja ta farko a jami'a watau 'First Class'

Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum

Ilorin, Kwara - Wani haziƙin matashi ya kammala karatun digiri na farko a Jami'ar Ilorin ta jihar Kwara da sakamako mai ban sha'awa.

Matashin ya karanci darasin lissafi kuma ya yi kaca-kaca da shi, inda ya gama da sakamako mai daraja ta ɗaya watau 'First class'.

Kara karanta wannan

Mutane sun shiga matsala yayin da ruwa ya mamaye garuruwa 25, an samu bayanai

Bayan ƴa karɓi satifiket ɗinsa, haziƙin matashin mai suna Ayodeji Akinsanya ya garzaya kafafen sada zumunta inda ya wallafa nasarar da ya samu a shafin X.

Nasarorin da matashin ya samu a UNILORIN

A cewar Ayodeji, ya kammala karatunsa ne da maki CGPA na 4.97 sannan kuma shi ne dalibin da ya fi kowane ƙoƙari a shekarar a fannin lissafi.

Har ila yau Ayodeji ya zama ɗalibi mafi hazaƙa da kokari a gaba ɗaya Jami'ar Ilorin a wannan shekara.

Sannan kuma an ba shi lambar yabo a matsayin ɗalibi mafi hazaƙa a tsangayar kimiyya a UNILORIN.

Ayodeji ya lissafa nasarorin da ya samu kamar haka:

"Darasin lissafi 4.97/5.00

Za a buga takarduna uku,

ɗalibi mafi hazaƙa a fannin lissafi,

tsangayar kimiyya da kuma ɗalibin da ya gama karatu da sakamako mafi kyau a jami'a."

Kara karanta wannan

Gwamna a Arewa ya hango haɗari, ya rufe manyan makarantun kuɗi nan take

Martanin wasu mutane kan nasarar matashin

@phychem11 ya ce:

"Wasu mutanen ba su gajiya da karatu, ina taya ka murna Ayo."

@mubby249 ya ce:

"Ina taya ka murna ɗan uwa."

@Hakeem_Onitolo ya ce:

"Ina tayaka murna ɗan uwa, ka yi nasara babba. Kai tauraro ne kuma yanzu ka fara haskawa."

Mace ta kafa tarihi a Jami'ar Babcock

Ku na da labarin wata matashiya ‘yar Najeriya ta kafa tarihi a jami’ar Babcock, Ilishan-Remo bayan kamala digiri dinta.

Dalibar ta kamala digirin farko a kimiyyar na’ura mai kwakwalwa tare da samun makin 5.0 GPA a shekarar karshe.

Muhammad Malumfashi, babban edita a sashen Hausa na Legit ya duba labarin.

Asali: Legit.ng