Trump Na cikin Yaki da Iran, Gagarumar Matsala Ta Tunkaro Shi a Amurka
- Shugaban kasar Amurka, Donald Trump na ci gaba da jagorantar yakin da kasarsa ta kaddamar kan Iran tare da hadin gwiwar Isra'ila
- Yayin da Trump ke ci gaba da ikirarin samun gagarumar nasara a yakin da ake, matsala ta tunkaro shi a cikin gida
- An shirya gudanar da wata gagarumar zanga-zanga domin nuna adawa da salon mulkinsa da manufofin gwamnatinsa
CHECK OUT: How to Start Earning with Copywriting in Just 7 Days – Even if You’re a Complete Beginner
Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi
Birnin Washington, Amurka - Ana sa ran gudanar da gagarumar zanga-zanga a faɗin ƙasar Amurka domin nuna adawa ga Shugaba Donald Trump.
Za a yi zanga-zangar ne yayin da miliyoyin mutane ke fito da fushinsu kan abin da suke kallo a matsayin mulkin kama-karya da sauran hanyoyin cin zarafin bil'adama da take dokoki.
Source: Getty Images
Tashar Aljazeera ta kawo rahoton cewa za a gudanar da zanga-zangar ne a ranar Asabar, 28 ga watan Maris 2026.
Za a yi zanga-zangar adawa da Trump
Wannan ne karo na uku a ƙasa da shekara guda da Amurkawa za su fito kan tituna a matsayin ɓangare na wani yunkuri na jama'a da aka yi wa laƙabi da "No Kings".
Yunkurin dai shi ne babban dandalin nuna rashin amincewa da Trump tun bayan fara wa'adin mulkinsa na biyu a watan Janairun 2025.
Kuma a yanzu suna da wani sabon dalilin yin fushi, yaƙin Iran wanda Trump ya ƙaddamar tare da Isra'ila, mai manufofi da jadawalin kammalawa da ke yawan sauyawa.
Ranar farko ta irin wannan zanga-zangar a faɗin ƙasa ta zo ne a watan Yunin 2025, ranar cikarsa shekaru 79 da haihuwa, wadda ta zo daidai da fareti na soja da ya nace sai an yi a Washington.
Miliyoyin mutane da dama ne suka fito, tun daga New York har zuwa San Francisco da sauran wurare da dama a tsakani.
Rana ta biyu ta "No Kings" a watan Oktoba ta jawo kimanin masu zanga-zanga miliyan bakwai, a cewar masu shirya taron.
Meyasa za a yi zanga-zangar?
Manufar yanzu ita ce fito da mutane fiye da haka a ranar Asabar, yayin da farin jinin Trump ya ragu zuwa kusan kashi 40 cikin 100, tashar France24 ta kawo rahoton.
Sannan zaɓubbukan tsakiyar wa'adi na gabatowa a watan Nuwamba, inda jam'iyyar Republican ta Trump za ta iya rasa iko da duka rukunonin majalisar dokoki biyu.
Kamar yadda mutane da dama a ƙungiyarsa ta "Make America Great Again" ke girmama Trump, haka su ma mutanen da ke ɗayan ɓangaren siyasar Amurka ba sa ƙaunarsa.
Source: Getty Images
Abokan hamayyar Trump suna kukan yadda yake amfani da dokokin zartarwa wajen mulki, amfani da ma'aikatar shari'a wajen gurfanar da abokan hamayya.
Ana adawa da manufofin Trump
Suna kuma adawa da yaƙi da shirye-shiryen sauya jinsi, da kuma sabuwae sha'awar nuna ƙarfin sojojin Amurka bayan ya yi kamfen a matsayin mutumin da ke son zaman lafiya.
"Tun bayan zanga-zangarmu ta ƙarshe, wannan gwamnati ta jefa mu cikin yaƙi sosai," in ji Naveed Shah na ƙungiyar Common Defense, wata ƙungiyar tsofaffin soji da ke cikin rukunin "No Kings".
"A gida, mun kalli yadda aka kashe 'yan ƙasa a kan tituna ta hanyar amfani da dakarun soja. Mun ga yadda aka rarraba iyalai kuma ake tsangwamar baƙi. Dukkan waɗannan an yi su ne da sunan mutum ɗaya da ke ƙoƙarin yin mulki kamar sarki."
- Naveed Shah
Iran ta raunata sojojin Amurka
A wani labarin kuma, kun ji cewa Iran ta ci gaba da kai hare-hare kan Amurka da Isra'ila yayin da ake gwabza fada a yankin Gabas ta Tsakiya.
Iran ta kai wani harin ramuwar gayya kan sojojin Amurka da ke wani sansani a Saudiyya, inda ta musu ruwan makamai masu linzami.
Harin na Iran a sansanin Prince Sultan da ke Saudiyya ya jikkata sojojin Amurka 12, biyu daga cikinsu cikin mawuyacin hali.
Asali: Legit.ng
