Babbar Magana: An Yi Yunkurin Sasanta Amurka da Iran, Sakamakon Bai Yiwa Kasashe Dadi ba
Amurka - Gwamnatin Shugaba Donald Trump ta ƙasar Amurka ta yi watsi da yunƙurin wasu ƙasashen Gabas ta Tsakiya na fara tattaunawar diflomasiyya domin kawo ƙarshen yaƙin da ake yi da Iran.
Legit.ng Hausa ta bude tasha a manhajar Whatsapp. Kasance tare da mu don samun rahotanni da dumi-dumi!
Rahotanni daga majiyoyi masu masaniya kan tattaunawar sun ce ƙasashe da dama sun yi ƙoƙarin shiga tsakani domin tsagaita wuta, amma gwamnatin Trump ta nuna cewa ba zai yiwu ba a yanzu.
Source: Twitter
Iran ta ƙi yarda da sulhu da Amurka
A bangaren Tehran, majiyoyi biyu daga cikin manyan jami’an Iran sun shaidawa Reauters cewa ƙasar ba za ta amince da batun tsagaita wuta ba har sai Amurka da Isra’ila sun dakatar da duk hare-haren da suke kaiwa.
Iran ta kuma gabatar da wasu sharuɗɗa kafin ta amince da sulhu, ciki har da dakatar da hare-haren Amurka da Isra’ila gaba ɗaya da biyan diyya kn asarar da yakin ya haifar.
Yunƙurin sasanci daga wasu ƙasashe
Ƙasashen da suka yi ƙoƙarin shiga tsakani sun haɗa da Oman, wacce ta taba shiga tsakani a tattaunawar Iran da Amurka kafin yaƙin, da Egypt, wacce ita ma ta yi ƙoƙarin sake buɗe zaman tattaunawa.
Sai dai majiyoyi sun ce Fadar White House ta bayyana cewa Shugaba Trump yana so ya ci gaba da hare-hare domin ƙara raunana ƙarfin sojojin Iran.
Wani jami’i a gwamnatin Amurka ya ce:
“Shugaban kasa ba ya sha’awar tattaunawa a yanzu. Za mu ci gaba da wannan yakin ba tare da tsayawa ba.”
An fara matsin lamba ga Trump
Wasu jami’an Amurka na gargadin cewa tsawon lokacin da za a dauka a yaƙin na iya jefa gwamnatin Trump cikin matsin lamba na siyasa, musamman saboda tashin farashin mai da fetur da karatowar zaɓukan majalisar dokokin Amurka.
Sai dai wasu masu ba shi shawara suna ƙarfafa shi da ya ci gaba da yaƙin domin lalata shirin makamai masu linzami na Iran da hana ta samun makamin nukiliya.
Duk da yunƙurin sasanci daga wasu ƙasashe, bangarorin biyu na ƙara tsaurara matsayinsu, lamarin da ke nuna cewa yaƙin na iya ɗaukar lokaci mai tsawo kafin a samu mafita.
Ku saurari karin bayani...
Asali: Legit.ng
