Buhari ya yi wa Fafaroma baran addu’o’i yayin da za a shiga da shi tiyata a asibiti

Litinin, Yuli 05, 2021 at 8:13 Safiya daga Muhammad Malumfashi

Shugaba Muhammadu Buhari ya bukaci a taya Fafaroma da addu’o’i a ko ta ina
Za a yi wa Shugaban mabiya darikar Katolika da ke fadin Duniya aiki a asibiti
Buhari ya roki Ubangiji ya sa ayi wannan aiki lafiya, a fito da Fafaroman lafiya

Shugaba Muhammadu Buhari ya fito, ya yi magana yayin da ake shirin shiga da fafaroma asibiti, inda za ayi masa wani aiki a tumbinsa.

Kamar yadda mu ka samu labari, shugaban Najeriyar ya fitar da jawabi na musamman ne ta bakin hadiminsa, Malam Garba Shehu.

A jawabin fatan alheri da Allah ya ba ka lafiya da shugaban Najeriyar ya yi, ya roki Ubangiji ya yi gaggawar ba Fafaroma lafiya bayan aikin.

Garba Shehu, wanda ke taimaka wa shugaba Muhammadu Buhari wajen yada labarai ya fitar da jawabin ne a ranar Lahadi, 4 ga watan Yuli.

Jawabin shugaban Najeriya

“Shugaba Muhammadu Buhari ya aika sakon samun lafiya ga shugaban cocin darikar katolika, Fafaroma Francis, yayin da ake shirin yi masa aiki a hanji.”

“Shugaban kasar ya kuma yi kira ga mutanen Najeriya da sauran kasashen Duniya su sa Fafaroma a addu’a, a daidai lokacin da za ayi masa wannan aiki.”

“Ya na yi masa fatan samun sauki cikin gaggawa.”

Rahotanni daga Reuters sun ce har an ayi wa Fafaroma Francis aiki a uwar hanjinsa. Babban hadiminsa ya ce ya fara samun sauki a gadon asibiti.

Wannan ne karon farko da Fafaroman mai shekara 84 ya kwanta, aka yi masa aiki tun da ya zama jagoran kiristocin da ke bin darikar katolika a 2013.

Mai magana da yawun Fafaroman, Matteo Bruni, ya ce ya soma murmure wa bayan an fito da shi, an ce sai da aka yi masa allurar barci kafin a barka shi.

Idan za ku tuna, kwanaki sai da Fafaroma Francis ya fito ya soki harin da ‘yan ta’addan Boko Haram su ka kai a garin Zabarmari, da ke jihar Borno.

Babban limamin na kasar Rome ya soki harin ta’addan a hudubar da ya saba yi a kowane mako. 'Yan Boko Haram sun hallaka mutane da-dama a lokacin.

Asali: Legit.ng