Labarai

Bayan shekaru fiye da 60, Sabon Sarkin Zazzau ya dawo da idi zuwa filin Mallawa

Talata, Mayu 11, 2021 at 5:36 Yamma daga Muhammad Malumfashi 2 - tsawon mintuna

- Wannan shekarar Zazzagawa za su yi sallar idi ne a filin Mallawa

- An samu wannan sauyi ne bayan mulki ya koma hannun Mallawa

- A tarihi kowane gidan sarauta suna da wurin da su ke yin sallar idi

Rahotanni daga Daily Trust sun bayyana cewa wannan karo an samu sauyi game da wurin da za a gudanar da sallar idin karamar sallah a Zaria.

Wannan shekara, Mai martaba Sarkin Zazzau, Ahmed Nuhu Bamalli zai yi sallah ne a babban filin idin Mallawa da ke hanyar Zaria zuwa garin Jos.

A kasar Zazzau, kowane gidan sarauta ya na da wurin da yake gudanar da sallar idi a tarihi.

KU KARANTA: Gwamna El-Rufai ya durkusa a gaban Sarki Ahmad Bamalli

Wannan ne karon farko da mutanen Zazzau za su fita zuwa wani fili dabam da na Kofar Doka domin gudanar da sallar idi a cikin shekaru 62.

Kafin Mai martaba Sarki Ahmed Nuhu Bamalli, ya dare gadon sarauta, sarakunan bayansa sun yi idi ne a wani wuri da ke yamma da filin mallawa.

Wani babban jami’in fadar Sarkin Zazzau, Alhaji Abubakar Ladan, ya tabbatar wa ‘yan jarida wannan shekara za ayi sallah ne a filin mallawa.

Sarakunan Zazzau Muhammad Aminu, da Shehu Idris wanda su ka fito daga gidan Katsinawa sun shafe shekaru 62 suna yin sallah a Kofar Doka.

KU KARANTA: Sallar Juma'ar farko da Sarki Ahmed Nuhu Bamalli ya yi

Bayan shekaru fiye da 60, Sabon Sarkin Zazzau ya dawo da idi zuwa filin Mallawa — Sabon Sarkin Zazzau, Ahmad Bamalli Hoto: @Mallawa
Asali: Twitter

Wanda aka haifa shekaru 60 da suka wuce bai taba samun sallar idi a filin mallawa ba. Dawowar sarautar zuwa gidansu ya canza abubuwa a bana.

Legit.ng Hausa ta samu labari ana ta shirye-shiryen bikin sallah a Zaria, inda ake ganin ana wuce wa da abincin dabbobi daga nesa zuwa fadar Sarki.

Ana rade-radin wannan karo za ayi hawa na musamman a Zazzau, ganin wannan ce sallar farko da Mai martaba Ahmad Bamalli zai yi a gadon mulki.

Idan za ku tuna, a ranar 7 ga watan Oktoba, 2020, gwamnatin Kaduna ta tabbatar da Ambasada Ahmad Nuhu Bamalli a matsayin sabon Sarkin Zazzau.

Kakaninsa Malam Musa su ne su ka kafa sarautar kasar Zazzau bayan jihadin Shehu Danfodio. Mahaifinsa Magajin Gari, Nuhu Bamalli ya rasu a 2001.

Asali: Legit.ng

Authors:

Muhammad Malumfashi (Hausa writer) M. Malumfashi ya samu Digirin farko a ilmin komfuta a ABU Zaria. Baya ga haka ya yi Digirgir a fannin kula da bayanai da wani Digirgir a ilmin aikin jarida duk daga jami'ar. Malumfashi ya kan kawo labaran siyasa, addini, wasanni da al’ada. Ya halarci taron karawa juna sani iri-iri. Imel: muhammad.malumfashi@corp.legit.ng